कळंबू  ः गेल्या पाच- सहा महिन्यांपासून रोजगारानिमित्त विविध ठिकाणी स्थलांतरित झालेले आदिवासी मजूर आता गावाकडे परतू लागले आहेत. या मुळे ओस पडलेले पाडे, वस्त्या पुन्हा गजबजू लागल्या आहेत. 

दसरा, दिवाळीनंतर ग्रामीण भागातील बहुतेक मजूर रोजगारानिमित्त गुजरात व सौराष्ट्रसह परराज्यात उदरनिर्वाहासाठी कुटुंबासह स्थलांतर करतात. या मुळे बहुतेक मुले शिक्षणापासून वंचित राहतात. शहादा तालुक्यातील गाव व पाडे ओस पडले होते. या मुळे स्थानिक व्यावसायिकांना याचा फटका सहन करावा लागला. मात्र, आठ ते १५ दिवसांपासून स्थलांतरित कुटुंबे गावाकडे येण्यास सुरवात झाल्याने गावे, पाडे पुन्हा गजबजू लागले आहेत. या मुळे स्थानिक व्यावसायिकांमध्ये आनंदाचे वातावरण दिसून येत आहे.

घरवापसी झालेली कुटुंबातील मुले शाळेत जातील. या मुळे विद्यार्थिसंख्याही वाढणार आहे. दरम्यान, धडगाव तालुक्यातील बहुतांश मजूर शहादा, शिंदखेडा व शिरपूर तालुक्यातील विविध गावांत रोजगारानिमित्त स्थायिक झाले आहेत. सध्या गहू, हरभरा, दादर कापणी जोरावर सुरू आहे. शेतकऱ्यांना मजूर मिळाल्याने पीक काढणीस वेग आला आहे.  

संपादन- भूषण श्रीखंडे