पिंपळनेर ः एकविसाव्या शतकात जगाने विज्ञानाची कास धरत प्रगतीच्या दिशेने झेप घेतल्यानंतरही अंधश्रद्धेला खतपाणी घालणाऱ्या घटना कुठे ना कुठे घडतच असतात. अशाच अंधश्रद्धेतून सोमवारपासून धुळे शहरासह जिल्हाभरात सोशल मीडियावरून अफवा फोफावली असून, मुलांच्या मृत्यूच्या भीतीने महिलांकडून निंबाच्या झाडाखाली दिवे लावण्यासह पूजा केली जात आहे. 
नंदुरबार जिल्ह्यात एका तृतीयपंथीयाची हत्या झाली असून, त्याने शाप दिल्याने मुलांचा मृत्यू होणार असल्याच्या भीतीतून ज्याला एक मुलगा असेल त्यांनी एक कणकेचा दिवा, तर ज्याला दोन मुले असतील त्यांनी दोन कणकेचे दिवे निंबाच्या झाडाखाली लावून पूजा करण्याची अफवा सोशल मीडियावरून पसरली. कुणी "कोरोना'च्या अफवेची झालर लावत आहेत. 
या अफवेमुळे कालपासून धुळे शहरासह जिल्हाभरात समस्त महिलांतर्फे निंबाच्या झाडाखाली कणकेचे दिवे लावण्यात येत असून, पूजाही करण्यात येत आहे. त्यात सुशिक्षित महिलांचाही सहभाग होता, हे विशेष. धुळे तालुक्‍यातील नगावसह सोनगीर परिसरातील महिलांनीही निंबाच्या झाडाखाली दिवे लावले. परिणामी जमावबंदी व अंधश्रद्धा निर्मूलन कायद्याचे उल्लंघन होत असल्याचे दिसून येते. दरम्यान, केवळ घरातच बसा. एक तासाच्या अंतराने हात-पाय तोंड पाण्याने स्वच्छ धुवा, आपणच आपले रक्षक बना. कोणतीही अंधश्रद्धा पसरेल, असे कृत्य करू नका. "मेसेज'ही फॉरवर्ड करू नका, तसे केल्यास कायदेशीर कारवाईला सामोरे जावे लागेल. विवेकी व विज्ञानवादी व्हा, असा सल्ला "अंनिस'चे जिल्हा कार्यवाह सुभाष जगताप यांनी दिला.