रावेर : वाघोड (ता. रावेर) येथे अवैध दारू विक्रेत्यांच्या विरोधात संतप्त महिलांनी आज (ता 23) रुद्रावतार धारण करत दारू विक्रेत्यांचे तीन दुकाने पेटविले. 
वाघोड गावात दारूबंदी असताना सर्रासपणे विक्री होत होती. याबाबत पोलिसांकडे वारंवार तक्रारी करूनही दारूबंदी होत नव्हती. आज रात्री महिलांनी एकत्र येत रुद्रावतार धारण केला. गावातील बसस्थानक भागातील एक आणि अन्य एक अशा अवैध दारू विक्री करणाऱ्या दारू विक्रेत्यांच्या तीन टपऱ्या जाळून टाकल्या. सुरवातीला 20-25 महिलांनी ही आक्रमक भूमिका घेतली. ही बातमी गावात कळताच उत्स्फूर्तपणे आणखी शंभर सव्वाशे महिला त्यात सहभागी झाल्या आणि त्यांनी पोलिस अधिकाऱ्यांना जाब विचारला. 
दारूमुळे गावातील अनेकांचे संसार उद्‌ध्वस्त होत होते. असे असताना दारू विक्रेत्यांचा धंदा जोमाने सुरू होता. पोलिसांकडे वारंवार तक्रारी करूनही त्यांनी डोळेझाक केल्याने महिलांचा संताप अनावर झाला होता. अवैध धंदेवाल्यांवर कारवाईची मागणी होत असताना पोलिसांकडून थातूरमातूर कारवाई करून त्यांना सोडून देण्यात येत होते. आज (ता 23) रात्री महिलांनी एकत्र येत अवैध दारू विक्रेत्यांचा बंदोबस्त करण्यासाठी गावातील तीन टपऱ्या जाळून टाकल्या. दरम्यान रावेर पोलिस ठाण्याचे उपनिरीक्षक सुनील कदम व पोलिसांनी घटनास्थळी धाव घेतली असता महिलांनी त्यांना जाब विचारत दारू विक्री बंद करण्याची मागणी केली. 

पाच वर्षापूर्वी आडवी बाटली 
वाघोड गावातील महिलांनी दारूबंदी विरोधात यापूर्वीही एल्गार केला होता. त्यावेळी मतदान होऊन दारूचे दुकान बंद करण्याबाबत महिलांनी कौल दिल्याने गावातील देशीदारूचे दुकान बंद करण्यात आले होते. मात्र अवैध दारू विक्रेत्यांनी दुकाने पुन्हा थाटल्याने पूर्वी सारखाच त्रास महिलांना व ग्रामस्थांना होऊ लागला होता. दारू पिणाऱ्यांची आरडाओरड, भांडण तंटे, घरात पैसे न देणे, महिलांना मारहाण होत होते. गावात दारूबंदी होऊनही फायदा होत नाही यामुळे महिलांच्या संयमाचा बांध सुटला व त्यांनी दुकाने पेटवून देत रूद्रावताराचे दर्शन घडविले.