शहादा: जन्माला आलो आहोत तर निसर्गासोबत वेगळ्या पद्धतीने आनंद साजरा करावा. या हेतूने निझर या मूळ गावाचे व सध्या सोनगड (जि. तापी) येथे स्थायिक असलेले राकेश पटेल यांनी वडील ओंकार पटेल व भगिनी मालवीबेन यांच्या वाढदिवसानिमित्त चक्क ऑक्सिजन पार्कची निर्मिती केली. त्याच्या या पर्यावरण पूरक उपक्रमाला मित्रांची साथ लाभल्याने हा पार्क पूर्णत्वास आला आहे. 

सोनगडच्या देसरा कॉलनी परिसरातील गणेश मंदिर परिसर आणि त्या शेजारच्या डोंगरावर राकेश पटेल कुटुंबाने सुमारे ३०० झाडांची रोपे लावून अनोख्या पद्धतीने वडील व भगिनीचा वाढदिवस साजरा केला. पर्यावरण जनजागृतीसाठी राकेशभाईंनी एक अनोखा उपक्रम हाती घेतला आहे. गत दोन वर्षांत सहाशेहून अधिक झाडे लावल्यानंतर मंदिरालगत असलेल्या टेकडीला ‘ऑक्सिजन पार्क’ असे नाव देण्यात आले आहे. सोनगडच्या या परिसरात जास्तीत जास्त झाडे लावून जंगल तयार करण्यासह तसेच सूर्योदय व सूर्यास्ताच्या नैसर्गिक देखाव्याचा आनंद घेण्याच्या दृष्टीने राकेशभाई प्रयत्न करीत आहेत. सोबत पालिकेनेही मदतीचा हात देत व्यायामाची उपकरणे उपलब्ध करून दिली आहेत.

 
हा पार्क नागरिकांच्या शारीरिक आणि मानसिक आरोग्यासाठीचे आकर्षणाचे केंद्र बनले आहे. या नैसर्गिक टेकडीला (ऑक्सिजन पार्क) भेट देण्यासाठी पर्यावरण प्रेमी व नागरिक गर्दी करतात. राकेशभाईंनी हा नावीन्यपूर्ण उपक्रम हाती घेत दोन वर्षात पूर्णत्वास नेला आहे. पर्यावरण जनजागृती करण्यापेक्षा प्रत्यक्ष साकारण्याची किमया करणारे पटेल व त्यांना मदतीचा हात देणाऱ्या मित्र परिवाराचे परिसरात कौतुक करण्यात येत आहे. 

संपादन- भूषण श्रीखंडे