देवळा: खालप (ता. देवळा) शिवारात अज्ञात रोगामुळे सुमारे 32 मेंढ्या मृत्युमुखी पडल्या असून, 50 पेक्षा अधिक मेंढ्यांना या रोगाची लागण झाल्याने लाखोंचे नुकसान झाले आहे. यामुळे मेंढपाळांमध्ये चिंतेचे वातावरण असून, रोगाची लागण इतर मेंढ्यांना व कळपाला होऊ नये, म्हणून प्रतिबंधात्मक उपाययोजना केल्या जात आहेत. 
ठेंगोडा (ता. बागलाण) येथील संजय झाडे व अभिमन झाडे यांच्या मालकीच्या 150 मेंढ्या असून, देवळा तालुक्‍यात खालप शिवारात त्यांचे वाडे बसत आहेत. दोन दिवसांपासून अज्ञात रोगामुळे मेंढ्या मृत्युमुखी पडत आहेत. आतापर्यंत 32 मेंढ्या मृत्युमुखी पडल्या असून, इतर 50 पेक्षा अधिक रोगाने ग्रस्त आहेत. पशुवैद्यकांनी तपासणी करून मेंढ्यांवर उपचार केले, पण रोगाचे निदान होत नाही. यामुळे उपचारास प्रतिसाद मिळत नसल्याचे पशुवैद्यक भाऊसाहेब वानले यांनी सांगितले. 
सध्या दुष्काळी स्थिती असून, अद्याप मोठा पाऊस न झाल्याने चारा व पाण्याची वानवाच आहे. त्यात मेंढ्या मृत्युमुखी पडल्याने झाडे कुटुंबीय निराशेच्या गर्तेत सापडले आहे. मृत मेंढ्यांचा तातडीने पंचनामा करून मेंढपाळांना आर्थिक मदत मिळावी, अशी मागणी धनगर समाजबांधव व शेतकऱ्यांनी केली आहे.