नंदुरबार : नंदुरबार जिल्ह्यास खरीप हंगाम (Kharif season) २०२१ करिता एकूण ९६ हजार २० मेट्रिक टन रासायनिक खतांचे (chemical fertillizer) आवंटन मजूर करण्यात आले असून त्यांपैकी २३ हजार ३४२ मेट्रिक टन रासायनिक खताचा पुरवठा करण्यात आलेला आहे.
(nandurbar district twenty three thousand chemical fertillizer supply)

नंदुरबार जिल्ह्यासाठी खरीप हंगामात एकूण खतांपैकी युरिया खताचे ४५ हजार ५९० मे.टन आवंटन मंजूर करण्यात आले असून आज अखेर ९ हजार ६०४ मे.टन युरिया प्राप्त झाला आहे. एप्रिल ते सप्टेंबर या कालावधीत टप्प्याटप्प्याने मंजूर आवंटनाप्रमाणे खत प्राप्त होईल.
आत्तापर्यंत शेतकऱ्यांनी (Farmers) मागील हंगामातील शिल्लक व चालू हंगामातील प्राप्त असे एकूण जवळपास १२ हजार ९४१ मे.टन युरिया खताची खरेदी केली आहे. शेतकरी बांधवांनी एकाच वेळी पूर्ण हंगामात लागणारा युरिया खरेदी न करता पिकाच्या गरजेनुसार व वाढीच्या आवश्यकतेनुसार खरेदी करावा. अनावश्यक साठा करू नये, जेणेकरून सर्वांना खत उपलब्ध होईल व तुटवडा जाणवणार नाही.

आधारकार्ड दाखवून मिळणार खत
शेतकरी बांधवांनी खत खरेदी करतेवेळी आधार कार्ड घेऊन जावे. शेतकऱ्यांनी खताच्या एकाच ग्रेडचा आग्रह न धरता उपलब्ध असलेल्या खतामधून आपली गरज भागवावी. पिकांना फक्त युरिया खताचीच आवश्यकता नसून इतरही घटक पिकांच्या वाढीसाठी व उत्पादन वाढीसाठी आवश्यक असतात हे विचारात घेऊन युरियासोबत कृषी विद्यापीठाने शिफारस केलेल्या रासायनिक खताचा प्रमाणात वापर करावा, असे आवाहन कृषी विकास अधिकारी जिल्हा परिषद नंदुरबार यांनी केले आहे.