Nandurbar News : अक्कलकुवा शहरात सुमारे दीड वर्षापासून महामार्गलगत अडगळीच्या ठिकाणी वास्तव्यास असलेल्या मनोरुग्ण महिलेने गेल्या आठवड्यात स्त्री जातीच्या अर्भकास जन्म दिल्याचा संतापजनक, माणुसकीला काळिमा फासण्याचा प्रकार समोर आला आहे. विशेष म्हणजे अक्कलकुवा पोलिस ठाण्याच्या हाकेच्या अंतरावरील ही घटना घडली. शहरात गेल्या वर्षभरापूर्वी अज्ञात ठिकाणाहून एक अज्ञात मनोरुग्ण महिला महामार्गाच्या जवळ असलेल्या एका कार्यालयाच्या आवारात वास्तव्य करीत होती. (Psychiatric woman gives birth through torture )

महिलेच्या या अवस्थेचा गैरफायदा घेत विकृत मानसिकतेच्या कळस गाठत तिच्यावर अज्ञात नराधमाने अत्याचार केल्याने ती गर्भवती राहिली. गेल्या आठवड्यात ती वास्तव्यास असलेल्या ठिकाणी प्रसूती झाली. मनोरुग्ण महिलेने जन्मास घातलेल्या नवजात अर्भकाच्या जीवितास धोका उद्भवू नये, तसेच त्याची हेळसांड होऊ नये यासाठी काहींनी पोलिसांशी संपर्क साधला साधण्यात आला. (latest marathi news)

ही माहिती समजताच नीताबाई माळी, भिकामचंद चव्हाण व अनिल अहिरे याच्या पथकाने नवजात अर्भकाला सुरक्षित अक्कलकुवा येथील ग्रामीण रुग्णालयात दाखल केले. आवश्यक ते प्राथमिक उपचार करून त्या नवजात अर्भकाला नंदुरबार येथील जिल्हा रुग्णालयातील बालसदन केंद्रात पाठविले. विकृत मानसिकतेतून घडलेल्या या संतापजनक व मानवतेला काळीमा फासणाऱ्या घटनेचा सर्व स्तरातून धिक्कार केला जात आहे.

यंत्रणा अनभिज्ञ

ही मनोरुग्ण महिला अक्कलकुवा पोलिस ठाण्याच्या अगदी हाकेच्या अंतरावर असलेल्या एका कार्यालयाच्या आवारातील पडक्या इमारतीच्या ओट्यावर गेल्या दीड वर्षापासून वास्तव्यास होती. शहरात भटकंती करून ती याच ठिकाणी मुक्काम करीत होती. ही महिला कुठून आली ? याबाबत कोणीही शोध घेण्याची तसदी घेतली नाही. तिच्यावर अत्याचार झाला. नंतर तिची प्रसूती झाली. या प्रकाराला जबाबदार नेमकं कोण आहे, हा असा प्रश्‍न यानिमित्ताने उपस्थित होत आहे.