खापर : अक्कलकुवा तालुक्यातील कंकाळामाळ परिसरात दोन आठवड्यांपासून वीज पुरवठा खंडित असल्याची बातमी ‘सकाळ’च्या माध्यमातून बुधवारी (ता.२६) प्रकाशित झाली होती. या बातमीची महावितरणने ताबडतोब दखल घेत २४ तासांत बिघाड शोधून वीज पुरवठा सुरळीत केला. यामुळे परिसरातील नागरिकांकडून समाधान व्यक्त होत आहे. (SAKAL Impact Electricity supply smooth in Kankalamal area)

महावितरणच्या भोंगळ नियोजनाचा त्रास ग्राहकांना होत असल्याच्या अनेक तक्रारी अक्कलकुवा तालुक्याभरात वारंवार होतात. वीजबिल वसुलीसाठी महावितरणाचे कर्मचारी तगादा लावतात, थेट दऱ्या-खोऱ्यात पोचतात परंतु दुरुस्तीसाठी तब्बल ३-४ महिने येत नाहीत. आदिवासी भागात राहणाऱ्यावर थेट दुर्लक्ष होत असल्याचा आरोप नागरिकांकडून होत होता.

तालुक्याच्या दुर्गम भागातील दऱ्या-खोऱ्यांत वसलेल्या कंकाळामाळ परिसरात दोन आठवड्यांपासून वीजपुरवठा खंडित होता. या परिस्थितीकडे महावितरणाकडून दुर्लक्ष केले जात असून वीजपुरवठा सुरळीत करण्यासाठी प्रयत्न होत नसल्याचा आरोप नागरिकांनी करत संतप्त प्रतिक्रिया व्यक्त केली होती. (latest marathi news)

या संदर्भात ‘सकाळ’ने दुर्गम भागातील नागरिकांची समस्या बातमीच्या माध्यमातून मांडली. परिणामी बातमी प्रसिद्धीच्या २४ तासांत या परिसरातील वीज पुरवठा सुरळीत झाल्यामुळे परिसरातील नागरिकांकडून समाधान व्यक्त करण्यात आले.

"कंकाळामाळ गावातील वीज पुरवठा बुधवार (ता.२६) सुरळीत करण्यात आलेला आहे. वीज वाहिनीला झाडे असल्याने वादळी पावसामुळे वीज पुरवठा वारंवार खंडित होत असे. मात्र झाडांच्या फांद्या कापून आणि तार जोडून वीज पुरवठा पूर्ववत केला आहे."

- नरेश कोरचा, सहायक अभियंता-अक्कलकुवा कक्ष