Dhule Lok Sabha Constituency : धुळे लोकसभा मतदारसंघातील मालेगाव मध्य, मालेगाव बाह्य व बागलाण हे तीन विधानसभा मतदारसंघ निर्णायक ठरणारे असतात. महायुतीचे उमेदवार डॉ. सुभाष भामरे व महाविकास आघाडीच्या उमेदवार डॉ. शोभा बच्छाव यांनी आपापल्या पक्षाच्या कार्यकर्त्यांचा मेळावा घेऊन वातावरण निर्मितीचा प्रयत्न केला आहे. मात्र, युती व आघाडीच्या पदाधिकाऱ्यांत अजूनही मोठ्या प्रमाणात रुसवेफुगवे आहेत. Malviya Mahayuti continues to tussle in Malegaon )

डॉ. भामरे यांच्या प्रचारात शिवसेना (शिंदे गट) पूर्ण ताकदीनिशी सक्रिय झालेली नाही; तर दुसरीकडे डॉ. बच्छाव यांच्या प्रचाराकडे काँग्रेसच्याच काही नेत्यांनी पाठ फिरवली आहे. धुळे लोकसभेची जागा महायुतीत भाजपच्या वाट्याला गेली. खासदार डॉ. भामरे यांना पक्षाने पुन्हा उमेदवारी दिल्याने इच्छुकांनी उघडपणे नाराजी व्यक्त केली. जवळपास महिनाभर हे नाराजीनाट्य सुरू होते.

भेटीगाठी घेत डॉ. भामरे यांनी इच्छुकांची समजूत घालण्याचा प्रयत्न केला आहे. भाजप पदाधिकारी व कार्यकर्त्यांचे शहरात तसेच ग्रामीण भागात मेळावे झाले. या मेळाव्यात उमेदवारीसाठी इच्छुक असलेल्या एका नेत्याच्या समर्थकांनी दांडी मारली. भाजप कार्यकर्त्यांचा मेळावा पार पडला असला, तरी शिवसेना (शिंदे गट) अद्याप पूर्णपणे सक्रिय झालेली नाही. मालेगाव बाह्य विधानसभा मतदारसंघात पालकमंत्री दादा भुसे यांचे वर्चस्व आहे. (Nashik Political News)

भाजप, शिवसेना व मित्रपक्षांचा संयुक्त मेळावा झाल्यावरच प्रचाराला दिशा मिळू शकेल. महाविकास आघाडीत धुळ्याची जागा काँग्रेसच्या वाट्याला आहे. नाशिकच्या माजी महापौर डॉ. शोभा बच्छाव यांना उमेदवारी दिल्याने पक्षांतर्गत रणकल्लोळ माजला. पक्षाचे नाशिक ग्रामीण जिल्हाध्यक्ष डॉ. तुषार शेवाळे व धुळे ग्रामीण जिल्हाध्यक्ष श्‍याम सनेर यांनी राजीनामा दिल्यावर पक्षश्रेष्ठींपुढे मोठा पेच निर्माण झाला.

श्री. सनेर यांची समजूत काढण्यात पक्ष नेतृत्वाला यश आले आहे. डॉ. बच्छाव यांनी महाविकास आघाडीच्या घटक पक्ष पदाधिकाऱ्यांचा शहरात मेळावा घेतला. या मेळाव्याकडे डॉ. शेवाळे व त्यांच्या समर्थकांनी पाठ फिरवली. मालेगाव बाह्य विधानसभा मतदारसंघातील ग्रामीण भागात अद्याप मेळावा झालेला नाही. डॉ. शेवाळे समर्थकांची दोन दिवसांपूर्वी बैठक झाली. ते डॉ. बच्छाव यांच्या प्रचारात सक्रिय होतात की अन्य पर्याय निवडतात, याबाबत उत्सुकता आहे.

हिरे समर्थकांकडे लक्ष

मालेगाव बाह्य विधानसभा मतदारसंघात पालकमंत्री दादा भुसे यांच्यापाठोपाठ शिवसेनेचे (ठाकरे गट) उपनेते अद्वय हिरे यांची ताकद आहे. जिल्हा बँक कर्ज प्रकरणी खटल्यात श्री. हिरे सध्या न्यायालयीन कोठडीत आहेत. त्यांचे समर्थक अद्याप प्रचारात सक्रिय झालेले नाहीत. हिरे समर्थकांकडेही सर्वांचे लक्ष लागून आहे.