नाशिक : शहरात स्वाइन फ्लू आजार बळावत असून, ऑगस्ट महिन्याच्या पहिल्या तीन आठवड्यातच १०६ रुग्ण महापालिकेच्या रुग्णालयांमध्ये आढळून आले आहे. त्या व्यतिरिक्त खासगी रुग्णालयांमध्ये ४९ रुग्ण असल्याची माहिती वैद्यकीय विभागाकडून देण्यात आली. (100 Patients in city of Swine Flu Update nashik Latest marathi news)

स्वाइन फ्लूमुळे आत्तापर्यंत शहरात तिघांचा मृत्यू झाला आहे. स्वाइन फ्लू पाठोपाठ डेंगीच्या रुग्णांची संख्या वाढताना दिसत आहे. जून महिन्यापासून शहरात स्वाइन फ्लूचे रुग्ण आढळून येत आहे. जून महिन्यात दोन जुलै महिन्यात २८ रुग्ण आढळून आले.

२१ ऑगस्टपर्यंत स्वाइन फ्लूच्या एकूण रुग्णांची संख्या १०६ वर जाऊन पोचली आहे. स्वाइन फ्लूचे रुग्ण वाढत असल्याच्या पार्श्वभूमीवर महापालिकेच्या वैद्यकीय विभागाकडून खासगी लॅबमध्ये स्वाइन फ्लूची संशयित रुग्ण व बाधित रुग्णांसंदर्भातील दैनंदिन माहिती सादर करण्याचे बंधन करण्यात आले आहे. यासंदर्भात वैद्यकीय विभागाने शहरातील सर्व खासगी रुग्णालयांना पत्र लिहून तशी माहिती दिली आहे, अशी माहिती वैद्यकीय डॉ. अधीक्षक बापूसाहेब नागरगोजे यांनी दिली.