नाशिक : थोर भारतीय गणिततज्‍ज्ञ रामानुजन यांच्या सन्मानार्थ स्पिरिट ऑफ रामानुजन (स्टेम) टॅलेंट इनिशिएटिव्हद्वारे शिष्यवृत्ती दिली जाते. नाशिकच्‍या १५ वर्षांच्या निखिल कुलकर्णी यास या वर्षीचा स्‍पिरिट ऑफ रामानुजन फेलोशिपचा बहुमान मिळाला आहे. (15 year old nikhil Kulkarni from nashik has received the spirit of ramanujan fellowship)

या उपक्रमातून जगभरातील उदयोन्मुख अभियंते, गणितज्‍ज्ञ आणि वैज्ञानिकांना आर्थिक अनुदान आणि मार्गदर्शनाची संधी दिली जाते. या संस्थेतर्फे आंतरराष्ट्रीय संशोधकांना जगभरातील संशोधन कार्यक्रमांत सहभागी होण्यासाठी किंवा स्वीकृत प्रायोजकांसह वैयक्तिक संशोधनासाठी पाच हजार डॉलरपर्यंत शिष्यवृत्ती दिली जाते. स्पिरिट ऑफ रामानुजन टॅलेंट इनिशिएटिव्हचे अध्यक्ष, अमेरिकन मॅथेमॅटिकल सोसायटीचे उपाध्यक्ष आणि व्हर्जिनिया विद्यापीठातील गणिताचे प्रा. केन ओनो आहेत.

गणित आणि विज्ञानामध्ये उल्लेखनीय काम केलेल्या व संशोधनात रुची असणाऱ्या जगभरातील ६० विद्यार्थ्यांना आजपर्यंत ही फेलोशिप देण्यात आली आहे. निखिल त्याला मिळालेल्या शिष्यवृत्तीचा वापर रँडमाइज्ड अल्गोरिदम शिकण्यासाठी तसेच त्यासंबंधी संशोधनासाठी करणार आहे. निखिलचे शालेय शिक्षण सिम्बायोसिस स्कूलमध्ये झाले असून, तेथील शिक्षकांचे त्याला मार्गदर्शन लाभले. त्याच्या या यशात भामरे तसेच रेझिंग अ मॅथेमॅटिशियन या संस्थेचे सचिव विनय नायर यांचेही मार्गदर्शन लाभले. भारतीय गणित ऑलिंपियाडमध्ये तसेच इतर अनेक गणितीय स्पर्धांमध्ये निखिलने उत्कृष्ट कामगिरी केली आहे. त्याला गणित शिकविण्याचीही आवड आहे. त्याच्या इतर आवडींमध्ये खगोलशास्त्र, जैवतंत्रज्ञान आणि स्पर्धात्मक वादविवाद यांचा समावेश आहे.

संगणक विज्ञान आणि गणितावर संशोधन करणार

१५ वर्षीय निखिलला या वर्षीची स्पिरिट ऑफ रामानुजन फेलोशिप पुरस्कृत केले आहे. तो संगणक विज्ञान आणि गणितावर संशोधन करणार आहे. ही फेलोशिप मिळविणारा निखिल दहावा भारतीय विद्यार्थी आहे.

(15 year old nikhil Kulkarni from nashik has received the spirit of ramanujan fellowship)