Onion Rate Hike : येथील कृषी उत्पन्न बाजार समितीत दीपोत्सवाच्या बारा दिवसांच्या सुटीनंतर सोमवारी (ता. २०) लाल कांद्याच्या भावात सरासरी सोळाशे रुपयांची वाढ झाली. मात्र त्याचवेळी उन्हाळ कांद्याच्या भावात सरासरी दोनशे रुपयांची घसरण झाली आहे.

उन्हाळ कांद्याला कमाल चार हजार ५४५ रुपये क्विंटल, असा भाव मिळाला. लाल कांद्याचा भाव क्विंटलला चार हजार १०१ रुपये असा राहिला. (1600 rupees increase in red onion price in Lasalgaon nashik news)

जिल्ह्यातील विंचूर उपबाजार वगळता सर्व बाजार समित्यांमध्ये कांदा लिलाव बंद असल्याने शेतकऱ्यांना ऐन दीपोत्सवात कांदा विक्रीस अडचण झाली. सणासुदीत पैशांची गरज असताना लिलाव बंदमुळे शेतकऱ्यांमध्ये चिंतेचे वातावरण पाहायला मिळाले.

६ नोव्हेंबरला लासलगाव बाजार समितीत लिलाव झाले असताना उन्हाळ कांद्याला कमाल चार हजार रुपये, तर लाल कांद्याला कमाल तीन हजार ५०१ रुपये क्विंटल, असा भाव मिळाला होता. ६ नोव्हेंबरच्या तुलनेत कांदा कमाल दरात ५०० ते ६०० रुपयांची तेजी दिसून आली.

दरम्यान, सोमवारी सकाळी साडेनऊला लाल कांद्याची नवीन आवक वाढल्याने कांद्याचे पूजन कांदा व्यापारी वृषभ राका, बाजार समितीचे संचालक प्रवीण कदम, बाळासाहेब दराडे व दत्तात्रय खाडे व संदीप गोमासे यांच्या हस्ते करण्यात आले.

कांद्याच्या भावाची स्थिती

(आकडे क्विंटलला रुपयांमध्ये)

(दहा हजार ९८८ क्विंटल आवक)

- उन्हाळ : किमान- एक हजार ५११, कमाल- चार हजार ५४५, सरासरी- चार हजार

- लाल : किमान- दोन हजार, कमाल- चार हजार १०१, सरासरी- तीन हजार ३००