जुने नाशिक : एस. टी. महामंडळाच्या सुमारे १७ बस अज्ञात व्यक्तींकडून शनिवार (ता. २७) रात्रीच्या सुमारास पंक्चर केल्याची घटना घडली आहे. याबाबत भद्रकाली पोलिस ठाण्यात नोंद झाली आहे.

गेल्या काही दिवसांपासून विविध मागण्यांसंदर्भात एसटी महामंडळाच्या कामगार संघटनांकडून कामबंद आंदोलन सुरू आहे. शुक्रवारी (ता. २६) काही संघटनांनी आंदोलनातून माघार घेतली. शनिवारी (ता. २७) काही कर्मचारी कामावर हजर झाल्याने काही मार्गांवरील बससेवा सुरू करण्यात आली. पोलिस बंदोबस्तात एन. डी. पटेल रोड येथील डेपोमधून बस सोडल्या. कर्मचाऱ्यांकडून कामावर हजर राहण्याच्या प्रकारास गालबोट लागले. धुळे मार्गावर शनिवारी तीन बसवर अज्ञातांकडून दगडफेक करत बसच्या काचा फोडण्यात आल्या.

तर मध्यरात्रीच्या सुमारास डेपोच्या आवारात उभ्या असलेल्या महामंडळाच्या सुमारे सतरा बसची हवा सोडण्याचा प्रकार घडला. रविवारी (ता. २८) सकाळी कर्मचारी, अधिकारी कामावर हजर झाले असता, प्रकार उघडकीस आला. बसचे अधिक नुकसान होऊ नये यासाठी सर्व बसचे पंक्चर काढून बस सुव्यवस्थित करण्यात आल्या. हा प्रकार कोणी केला असावा, याबाबतची माहिती अधिकाऱ्यांना मिळू शकली नाही.

परंतु ज्या बसचे पंक्चर करण्यात आल्या त्यांची संपूर्ण माहितीसह अज्ञात व्यक्तीकडून प्रकार घडून आणल्याचे पत्र एसटी महामंडळाच्या अधिकाऱ्यांकडून भद्रकाली पोलिस ठाण्यात देण्यात आले आहे. बस फोडण्यासह पंक्चर करण्याच्या घटना घडल्याने कर्मचाऱ्यांमध्ये काहीसे तणावाचे वातावरण आहे. शिवाय अन्य कुठल्या प्रकारचे नुकसान करण्याची शक्यता असल्याने रविवारी एकही मार्गावर बस सोडली नसल्याचे सांगण्यात आले. कामबंद आंदोलनास आणखी कुठले वळण लागेल, हे सांगणे कठीण झाल्याची चर्चा कर्मचाऱ्यांमध्ये आहे.