जुने नाशिक : गंजमाळ परिसरात दोन गटात दगडफेक झाल्याची घटना रविवारी (ता. २१) सायंकाळी घडली. भद्रकाली पोलिस ठाण्यात परस्परविरोधी गुन्हे दाखल करण्यात आले. परिसरात तणावपूर्ण शांतता आहे. कायदा सुव्यवस्थेचा प्रश्न निर्माण होऊ नये. यासाठी पोलिस बंदोबस्त लावण्यात आला आहे.

जुना वादातून दोन गटांमध्ये रविवारी सायंकाळी दोन गटांकडून एकमेकांवर दगडफेक करण्यात आली होती. काहींनी परिसरात उभे असलेल्या वाहनाची तोडफोड करत नुकसान केले होते. त्यानंतर जमावाने पोलिस ठाण्याकडे आपला मोर्चा वळवला होता. गंजमाळ परिसरासह पोलिस ठाण्यात तणावाचे वातावरण होते.

पोलिस आयुक्त जयंत नाईकनवरे, उपायुक्त अमोल तांबे, सहाय्यक आयुक्त दीपाली खन्ना यांच्यासह वरिष्ठ निरीक्षक दत्ता पवार, निरीक्षक दिलीप ठाकूर तसेच विजय ढमाळ, आँचल मुदगल यांच्यासह अन्य अधिकारी रविवारी रात्री उशिरापर्यंत पोलिस ठाण्यात तळ ठोकून होते.

मध्यरात्री सुमारे एकच्या सुमारास दोन्ही गटांकडून परस्परविरोधी गुन्हे दाखल करण्यात आले. पोलिसांकडून गुन्हे दाखल झाल्यानंतर रात्रीपासूनच संशयितांची धरपकड सुरू होती. सोमवारी (ता.२२) दुपारपर्यंत दोन्ही गटाच्या सुमारे १८ संशयीतांना पोलिसांनी ताब्यात घेतले आहे. त्यात दोन महिलांचा समावेश आहे. सोमवारीही उशिरापर्यंत संशयितांचा शोध सुरू होता.