Sakal Exclusive : नाशिक तहसील कार्यालयावर कामकाजाचा ताण आणि उपलब्ध मनुष्यबळाचा विचार करता तहसीलचे विभाजन करण्याचे नियोजन सुरू आहे. त्यासाठी नवीन प्रस्तावित अप्पर तहसील सुरू करण्यासाठी शासनाकडे प्रस्ताव पाठविण्यात आला.

जिल्हा आणि उत्तर महाराष्ट्राचे प्रशासकीय मुख्यालय असलेल्या नाशिक तालुक्यात महापालिका, कॅन्टोन्मेंट बोर्ड, भगूर नगरपालिकेसह जिल्हा परिषदेच्या चार गटांचा समावेश होतो. लोकसंख्या आणि राजशिष्टाचारासह प्रशासकीय व्यापाच्या तुलनेत सध्याचे मनुष्यबळ अपुरे पडते. (2 separate tehsil office in Nashik taluka news)

त्यामुळे तहसील कार्यालयाचे विभाजन करून वाढीव मनुष्यबळासह नवीन अप्पर तहसील कार्यालयाचा प्रस्ताव शासनाकडे करण्यात आला आहे. प्रस्तावित अप्पर तहसील करताना त्यासाठीची भौगोलिक रचना मात्र फार सोयीची नाही. आर्थिक पातळीवरील अधिकार, नव्या प्रस्तावित रचनेत ग्रामीण नागरिकांना अधिकच्या फेऱ्या मारण्याचा त्रास होण्याची शक्यता आहे

असे असेल अप्पर तहसील

नव्याने प्रस्तावित अप्पर तहसील कार्यक्षेत्रात पंचवटी, तपोवन, शहर, इंदिरानगर, सिडको, सातपूर, गंगापूर, आनंदवली, पिंपळगाव बहुला, कामटवाडे, देवळाली, देवळाली एक, देवळाली दोन, विहितगाव, दसक, पंचक, बेलतगव्हाण, संसरी, नाणेगाव, याशिवाय महिरावणी, दुडगाव, विल्होळी, पिंपळद, सारूळ, राजूर बहुला, रायगडनगर, जातेगाव, दहेगाव, तळेगाव अंजनेरी, बेलगाव ढगा, तिरडशेत, वासाळी, गणेशगाव (नाशिक), गणेशगाव (त्र्यंबकेश्वर), पिंपळगाव, गौळाणे आणि आंबेबहुला अशा ३० सज्जे आणि ७५ गावांचा समावेश सुचविला आहे.

हेही वाचा : Credit Card फसवणूक....काय घ्याल काळजी?

नवीन पदनिर्मिती

नव्याने होणाऱ्या अप्पर तहसील कार्यालयासाठी एक अप्पर तहसीलदार, दोन नायब तहसीलदार, चार अव्वल कारकून, सहा लिपिक, एक वाहनचालक अशा १४ कर्मचाऱ्यांची मागणी नोंदविली आहे. सुमारे ९४ लाख रुपये वार्षिक वेतन, पाच लाख आवर्ती, तर २५ लाख अनावर्ती खर्चाची मागणी नोंदविण्यात आली आहे.

गैरसोय अधिक

नव्या तहसिलात देवळालीतील दसक-पंचकपासून संसरीपर्यंतचा भाग सुचविला असताना लगतचा एकलहरे, शिंदे-पळसेसह अनेक भाग वगळले आहेत. संसरी, नाणेगाव, बेलतगव्हाणचे नागरिक एका कार्यालयात येतील. दसक-पंचकलगतच्या एकलहरेसह विविध भागांतील नागरिकांना मात्र दुसऱ्या तहसीलमध्ये जावे लागेल.

गोवर्धन, गिरणारे, आडगाव, गंगाम्हाळुंगीसह अनेक भाग जुन्या तहसीलमध्ये असतील; तर त्याचवेळी गिरणारेलगतच्या त्र्यंबक रोडवरील गावे मात्र नव्या तहसीलमध्ये असतील. गरीब आणि श्रीमंत तहसील अशा चित्रातून नागरिकांच्या चकरा कायमच राहतील. त्यामुळे ज्यांच्यासाठी कार्यालये करणार आहेत, त्यांना काय वाटते हे जाणून घेण्याची गरज आहे.