Nashik Crime News : शहराच्या चौगाव रोड नववसाहतीतील गणपतनगरमधील किराणा दुकानात कुरकुरे घेण्याच्या बहाण्याने आलेल्या दोघांनी एका महिलेची ६० हजार रुपये किमतीची २० ग्रॅम वजनाची सोन्याची पोत चोरून पोबारा घडल्याने शहरात घबराटीचे वातावरण निर्माण झाले आहे. (20 grams of gold was stolen on the pretext of buying packaged snacks Nashik Crime News)

दत्तात्रेय पवार यांनी कुटुंबाचा उदरनिर्वाह यासाठी शहराच्या चौगाव रोड नववसाहतीतील गणपतनगरमध्ये दत्तकृपा प्रोव्हिजन अँड जनरल स्टोअर्स या नावाचे दुकान सुरू केले आहे. सायंकाळी सातच्या सुमारास गणपतनगर येथे श्रीराम रथाच्या पालखीची मिरवणूक येणार होती.

याचवेळी दत्तात्रेय पवार हे दुकानातील काही सामान घेण्यासाठी शहरात गेले असता त्यांनी पत्नी तारामती दत्तात्रेय पवार यांना दुकानात थांबायला सांगितले. सायंकाळी सहा वाजून ४५ मिनिटांनी काळया रंगाचा शर्ट व निळ्या रंगाची पॅन्ट व दुसरा गुलाबी रंगाचा शर्ट व काळया रंगाची पॅन्ट घातलेले असे दोन युवक दुचाकीवरून दुकानाजवळ आले.

त्यातील एक जण दुचाकीवर बसून होता तर पाठीमागे बसलेला एक जण दुकानात आला व शंभर रुपये देऊन त्याने वीस रुपयांचे कुरकुरे विकत घेतले. त्यानंतर त्याने पुन्हा दहा रुपयाचे कुरकुरे विकत घेऊन निघून गेला.

काही वेळानंतर तारामती पवार यांना लक्षात आले, की आपल्या गळ्यातील वीस ग्रॅम सोन्याची ६० हजार रुपये किमतीची पोत गायब झाली आहे.

तेव्हा त्यांची खात्री झाली, की दुकानात कुरकुरे घेण्याच्या बहाण्याने आलेल्या दोन चोरट्यांनी हातचालाखी करून तारामती पवार यांच्या गळ्यातील सोन्याची पोत चोरली. याबाबत पवार यांनी सटाणा पोलिस ठाण्यात दोन चोरट्यांविरोधात फिर्याद दिली असून पोलिस निरीक्षक संदीप रणदिवे तपास करीत आहेत.