नाशिक : शहरात कोरोना (Corona) उद्रेक पुन्हा वाढू लागला आहे. शुक्रवारी (ता. १७) शहरात वेगवेगळ्या भागात २० कोरोना बाधित रुग्ण (Corona Patients) सापडले. त्यामुळे महापालिका (NMC) वैद्यकीय विभाग पुन्हा सतर्क झाला आहे. सायंकाळी तातडीने शहरातील सगळ्या रुग्णालयांना मुख्य वैद्यकीय अधिकाऱ्यांनी पत्र देत कोरोना रुग्णांबाबत हलगर्जीपणा न करता त्वरित माहिती कळविण्याच्या सूचना केल्या. (20 new corona patients in city Nashik Corona Update News)

शहरात पुन्हा एकदा कोरोना रुग्णसंख्या वाढू लागली आहे. शुक्रवारी शहरात ५२४ रुग्णांची तपासणी केल्यानंतर २० जण कोरोना पॉझिटिव्ह सापडले. त्यापैकी एक जण महापालिकेच्या डॉ. झाकिर हुसेन रुग्णालयात दाखल करण्यात आले. त्यामुळे सायंकाळनंतर महापालिका वैद्यकीय यंत्रणा सतर्क झाली. मुख्य वैद्यकीय अधिकारी डॉ. बापूसाहेब नागरगोजे यांनी शहरातील सगळ्या रुग्णालयांना पत्र देत कोरोना रुग्ण सापडल्यास त्वरित महापालिकेला कळविण्यासह खासगी रक्त लॅबकडून आयसीएमआर पोर्टलवर माहिती अपलोड करण्याचे, तसेच कोरोना तपासणीत पॉझिटिव्ह आढळणाऱ्या रुग्णांची माहिती तातडीने कळविण्यासाठी आवाहन केले.

"कोरोना प्रादुर्भाव वाढत असल्याने महापालिका वैद्यकीय अधिकाऱ्यांनी नागरिकांना काळजी घेण्याचे आवाहन केले. वाढत्या गर्दीत काळजी घ्यावी. मास्कचा वापर करावा. रुग्णांची संख्या वाढल्याने शासनाला प्रतिबंधात्मक उपाययोजना कराव्या लागू नयेत, याची प्रत्येकाने काळजी घ्यावी."

- डॉ. बापूसाहेब नागरगोजे, मुख्य वैद्यकीय अधिकारी, महापालिका