नाशिक : कांदा उत्पादक शेतकऱ्यांना भाव नसल्यामुळे मोठा तोटा सहन करावा लागत असून अनेक शेतकऱ्यांच्या डोळ्यात कांद्यामुळे अश्रू येत आहेत. भाव मिळत नसल्यामुळे कांद्यावर ट्रॅक्टर, जेसीबी फिरवल्याचे अनेक व्हिडिओ सोशल मीडियावर व्हायरल झाले आहेत. तर एक आणि दोन रूपयांच्या पावत्या देऊन बाजार समित्यांनीसुद्धा शेतकऱ्यांची जणू खिल्ली उडवल्याचे अनेक प्रकार घडले आहेत.

नाशिक जिल्ह्यातील एका शेतकऱ्याला २५ क्विंटल कांद्याचे फक्त १५२ रूपये मिळाले असून सदर शेतकऱ्याचा व्हिडिओ सोशल मीडियावर व्हायरल झाला आहे. या कांद्याला प्रतीकिलो फक्त १६ पैसे एवढा दर मिळाला आहे. या शेतकऱ्याला स्वत:च्या खिशातून गाडी भाड्यासाठी पैसे द्यावे लागले आहेत. या शेतकऱ्याच्या डोळ्यात अश्रू असल्याचं सदर व्हिडिओमध्ये दिसत आहे.

दरम्यान, कांदा उत्पादक शेतकऱ्यांना हमीभाव मिळत नसल्यामुळे मोठा फटका बसत आहे. तर अनेक शेतकऱ्यांचा उत्पादन खर्चसुद्धा निघत नसल्यामुळे स्वप्नावर पाणी फिरलं आहे. सध्या व्हायरल होत असलेल्या शेतकऱ्याच्या डोळ्यातील अश्रू स्पष्टपणे दिसत आहेत. अहमदनगर, सोलापूर, नाशिक, छत्रपती संभाजीनगर जिल्ह्यातील शेतकऱ्यांचा कांदा पिकाचा मोठा फटका बसला आहे.