इगतपुरी शहर : नाशिक-मुंबई महामार्गावर इगतपुरीजवळील बोरटेंभे शिवारात सोमवारी (ता. १) पहाटे चारच्या सुमारास भरधाव मर्सिडिज कार (एमएच ०२, ईएक्स ६७७७) भाजीपाला घेऊन जाणाऱ्या आयशरवर (एमएच १८, बीझेड ७२४७) पाठीमागून जोरदार धडकून झालेल्या अपघातात दादर (मुंबई) येथील तीन तरुण जागीच ठार झाले, तर एकजण गंभीर जखमी असून, त्याची प्रकृती चिंताजनक आहे. (3 killed in collision with speeding Mercedes truck Accident in Bortembhe Shiwar Nashik News)

अपघातामुळे काही काळ वाहतूक बंद ठेवण्यात आली होती. घटनेची माहिती मिळताच इगतपुरी पोलिस व महामार्ग पोलिस पथक घटनास्थळी पोहोचले व जखमींना रूट पेट्रोलिंग टीम, टोलप्लाझा रुग्णवाहिकेतून ग्रामीण रुग्णालयात नेले.

या घटनेतील तिघांना वैद्यकीय अधिकाऱ्यांनी तपासून मृत घोषित केले. एक जण गंभीर जखमी असल्याने त्यास नाशिक येथे खासगी रुग्णालयात दाखल केले आहे.

या घटनेत कारमधील मृत्यू झालेल्यांची नावे ध्यज युगराज जैन (२४, रा. दादर, मुंबई), शिखर शिशू यादव (२३, रा. १८०२ आशीर्वाद, कोकिळाबेन हॉस्पिटल, लेन ४, बंगलोज, लालबाग, मुंबई) व ऋषभ ललीत सोळंकी (२३ , रा. लालबाग, परेल, मुंबई) अशी आहेत.

तिघांच्या कुटुंबीयांनी ग्रामीण रुग्णालयात धाव घेतली. पोलिस निरीक्षक राजू सुर्वे यांच्या मार्गदर्शनाखाली सहाय्यक पोलिस निरीक्षक कांचन भोजणे, पोलिस उपनिरीक्षक सोपान राखोंडे व पोलिस पथक तपास करीत आहे.

ना फलक, ना चांगला रस्ता

इगतपुरी शहराकडे जाण्यासाठी बोरटेंभे, तळेगाव व महिंद्र कंपनी या भागातील महामार्गापासून जवळच मार्ग जोडला गेला आहे. मात्र महामार्गावर दिशाफलक लावले नसून गतिरोधकही अर्धवट स्थितीत आहेत.

तेथे मोठे खड्डे तयार झाले आहेत. अनेक भागात मोकाट जनावरे महामार्गावर अचानक येतात. त्यामुळे बोरटेंभे व तळेगाव महामार्गावरील अपघातात अनेकांचे बळी गेले आहेत.

घोटी टोलप्लाझा केवळ वसुलीवरच लक्ष केंद्रित करीत असल्याची वाहनचालकांची तक्रार आहे. महामार्गावरील सुरक्षा व रस्ते दुरुस्तीकडे मात्र साफ दुर्लक्ष केल्याने या भागात अपघाताचे प्रमाण दिवसागणिक वाढत असल्याची खंत वाहनधारकांनी व्यक्त केली.