नाशिक : शंभराहून अधिक दिवसांनंतर दैनंदिन कोरोनाबाधितांची संख्या पन्नासहून अधिक राहिल्‍यानंतर, सोमवार (ता. २७)चा दिवस जिल्‍हावासीयांसाठी दिलासादायक राहिला. दिवसभरात जिल्ह्या‍त ३० रुग्‍णांचे कोरोनाचे अहवाल पॉझिटिव्‍ह आले. साठ रुग्‍णांनी कोरोनावर यशस्‍वीरीत्‍या मात केली. यातून ॲक्‍टिव्‍ह रुग्णसंख्येत ३० ने घट झाली. सद्यःस्‍थितीत जिल्ह्यात १९९ बाधितांवर उपचार सुरू आहेत. (30 patients corona positive in nashik district nashik news update)

गेले काही दिवस दैनंदिन बाधितांच्‍या तुलनेत कोरोनामुक्‍त रुग्‍णांची संख्या अधिक राहत असल्‍याने सक्रिय रुग्णसंख्येत सातत्‍याने वाढ सुरू होती; परंतु आता कोरोनामुक्‍त रुग्‍णांची संख्यादेखील वाढत असल्‍याने ॲक्‍टिव्‍ह रुग्णसंख्या नियंत्रणात आहे.

सोमवारी नाशिक शहरातील २३, नाशिक ग्रामीणमधील पाच, तर जिल्‍ह्याबाहेरील दोन रुग्‍णांचे कोरोनाचे अहवाल पॉझिटिव्‍ह आले. मालेगाव महापालिका क्षेत्रात नव्‍याने बाधित आढळून आला नाही. सायंकाळी उशिरापर्यंत ३१७ अहवाल प्रलंबित होते.

यांपैकी सर्वाधिक २०२ अहवाल नाशिक ग्रामीण, तर नाशिक शहरातील ८२, मालेगावच्‍या ३३ रुग्‍णांचे अहवाल होते. गेल्‍या काही दिवसांपासून वाढलेला पॉझिटिव्हिटी दरही घसरला आहे. सोमवारी जिल्ह्याचा पॉझिटिव्‍हिटी दर १.९८ टक्‍के राहिला, तर नाशिक महापालिका क्षेत्राचा हा दर २.९६ टक्‍के राहिला. सध्या उपचार घेत असलेल्‍या बाधितांपैकी नाशिक महापालिका क्षेत्रातील १३०, नाशिक ग्रामीणमधील ५३, मालेगाव महापालिका क्षेत्रातील सहा, जिल्‍ह्याबाहेरील दहा बाधितांवर उपचार सुरू आहेत.

पालकमंत्री भुजबळांना दुसऱ्यांदा कोरोनाची लागण

नाशिकचे पालकमंत्री छगन भुजबळ यांनाही कोरोनाची लागण झालेली आहे. या संदर्भात ट्विट करत त्‍यांनी माहिती दिली. प्रकृती उत्तम असून, डॉक्‍टरांच्‍या सल्ल्‍यानुसार वैद्यकीय उपचार सुरू असल्‍याचे सांगताना संपर्कात असलेल्‍या व्‍यक्‍तींनी काळजी घ्यावी. लक्षणे दिसल्‍यास तत्‍काळ तपासणी करून घेण्याचे आवाहन त्‍यांनी केले आहे. मुख्यमंत्री उद्धव ठाकरे यांच्‍यासह उपमुख्यमंत्री अजित पवार यांनाही नुकतीच कोरोनाची लागण झालेली आहे. त्‍यापाठोपाठ आता पालकमंत्री भुजबळ यांचाही कोरोनाचा अहवाल पॉझिटिव्‍ह आला.