मालेगाव (जि. नाशिक) : शहरातील माळी नगर भागातील दहावी इयत्तेत शिकणाऱ्या काकाणी विद्यालयातील अल्पवयीन मुलीचा पाळत ठेवून पाठलाग करत तिचा विनयभंग केल्याच्या आरोपावरुन शशिकांत उर्फ सचिन बागूल (रा. शिवाजीनगर) याला येथील न्यायालयाने गुन्हा सिध्द झाल्याने सहा महिने कारावास व चार हजार रुपये दंडाची शिक्षा सुनावली. (6 months imprisonment for molesting minor girl Nashik Latest Crime News)

अल्पवयीन पिडीता दहावीत शिक्षण घेत होती. ५ ऑगस्ट २०१५ पासून शशिकांत उर्फ सचिन बागूल हा तिच्यावर पाळत ठेवून वाईट उद्देशाने तिचा पाठलाग करीत असे. पिडीतेच्या आई- वडिलांनी त्याला पाठलाग करत असतानाच पकडून किल्ला पोलिसांच्या ताब्यात दिले होते. संशयित आरोपीविरुद्ध पिडीतेच्या तक्रारीवरुन किल्ला पोलिस ठाण्यात विनयभंग व बाल लैंगिक अपराध पोक्सो अन्वये गुन्हा दाखल करुन उपनिरीक्षक बी. आर. बैरागी यांनी तपास करत खटला न्यायालयात पाठविला होता.

विशेष पोक्सो न्यायालयातील अतिरिक्त सह जिल्हा न्यायाधीश एस. सी. मगरे यांच्या समोर या खटल्याचे कामकाज चालले. सरकार पक्षातर्फे ॲड. संजय सोनवणे यांनी पाच साक्षीदार तपासले. त्यांना पोलिस निरीक्षक दिगंबर भदाणे, हवालदार भास्कर पगार यांनी सहाय्य केले. संशयिताविरुद्ध गुन्हा सिद्ध झाल्याने दोन वेगवेगळ्या कलमाखाली प्रत्येकी तीन याप्रमाणे सहा महिने शिक्षा व प्रत्येकी दोन हजार रुपये दंड या प्रमाणे चार हजार रुपये दंड, दंड न भरल्यास अतिरिक्त एक महिन्याच्या कारावासाची शिक्षा न्यायाधीश मगरे यांनी सुनावली.