नामपूर : स्थानिक स्वराज्य संस्थांमध्ये शिकणाऱ्या विद्यार्थ्यांच्या गुणवत्ता विकासासाठी शालेय शिक्षण विभागाने समूह शाळा योजना प्रस्तावित केली आहे.

या योजनेला शिक्षक संघटनांसह शैक्षणिक वर्तुळात विरोध होत असला तरी शिक्षण विभाग आपल्या निर्णयावर कायम असल्याने जिल्हा परिषदेने जिल्ह्यातील नऊ शाळांचा समूहशाळेसाठी शिक्षण आयुक्त कार्यालयास प्रस्ताव पाठवला आहे. कमी पटसंख्येसह एकाच आवारात भरणाऱ्या ३३ जिल्हा परिषदेच्या शाळांचे समूहशाळेत आगामी काळात रूपांतर होणार आहे. (9 group schools proposed in district Consolidation of 33 ZP schools with low enrollment Nashik News)

राज्यातील शिक्षण विभागाच्या अधिकाऱ्यांनी आपल्या कार्यक्षेत्रातील छोट्या शाळांचा विशेषतः आदर्श शाळांचा कमी पटाच्या शाळा जोडण्यासाठी प्रक्रिया सुरू करावी असे निर्देश उपमुख्यमंत्री अजित पवार यांच्या अध्यक्षतेखाली झालेल्या बैठकीत देण्यात आले होते.

गुणवत्तेच्या दृष्टिकोनातून विद्यार्थ्यांना पुरेशा प्रमाणात शैक्षणिक सुविधा मिळाव्यात व त्यांच्यामध्ये शिक्षणातील विविध अध्ययन क्षमता विकसित होण्यास वाव मिळावा हा यामागील प्रमुख उद्देश आहे.

या प्रस्तावाचे अवलोकन करून शिक्षणाधिकारी (प्राथमिक) यांनी आपल्या जिल्ह्यातील कमी पटाच्या सर्व शाळांचा विचार करून त्यापैकी शाळांचे एकत्रीकरण करून समूह शाळा तयार करण्यासंदर्भात प्रस्ताव तयार करण्याच्या सूचना प्राथमिक शिक्षणाधिकारी यांना देण्यात आल्या होत्या.

शाळेतील प्रत्येक विद्यार्थ्याचे सामाजिकीकरण होण्यासाठी, त्याच्यामध्ये खेळाडू वृत्ती निर्माण होण्यासाठी, गुणवत्तापूर्ण शिक्षण मिळण्यासाठी अनेक साधनसामग्रीची गरज असते. कमी पटसंख्येच्या शाळांना मात्र मर्यादा असतात. दृक-श्राव्य साधने, क्रीडांगण, खेळांची मैदाने व पुरेशा प्रमाणात शिक्षक सोबत असणे आवश्यक आहे.

कमी पटाच्या शाळांमध्ये या सर्व बाबींची अनुपलब्धता असल्याने याचा गुणवत्तापूर्ण शिक्षणावर व विद्यार्थ्यांच्या सर्वांगिण विकासावर प्रतिकूल परिणाम होताना दिसत आहे, अशी शिक्षण विभागाची भूमिका आहे.

जिल्हा परिषदेने सर्वेक्षण करून विहित नमुन्यात वरिष्ठ कार्यालयास समूहशाळेच्या निर्मितीबाबतची माहिती सादर केली आहे.