Nashik Rain News : पावसाळ्याचे तीन महिने पुरेसा पाऊस झालेला नाही; परंतु गेल्या दोन आठवड्यांत पावसाचा जोर वाढला आहे. शनिवारी (ता. २२) सायंकाळनंतर सुरू झालेला जोरदार पाऊस मध्यरात्रीपर्यंत सुरू होता.

यामुळे गंगापूर धरणातील साठा ९७.१० टक्क्यांवर पोहोचला आहे. पहाटेपर्यंत ३३ मि.मी. पावसाची नोंद झाली आहे. (97 percent water in Gangapur dam nashik news)

यंदा नाशिकसह राज्यातील बहुतांश जिल्ह्यांत पावसाअभावी दुष्काळसदृश परिस्थिती आहे. मात्र, दोन आठवड्यांपासून संततधार नसला तरी जोरदार पावसाची हजेरी लागत आहे. त्यामुळे गंगापूर धरणातील साठा ९७.१० टक्क्यांवर पोहोचला आहे.

शनिवारी सायंकाळी धुवांधार पावसाने हजेरी लावली. विशेषत: मध्यरात्रीपर्यंत पावसाची संततधार सुरू होती.

गंगापूर धरणाच्या पाणलोट क्षेत्रात मुसळधार पाऊस झाल्याने पाणीपातळी वाढली.

धरणातून तीन हजार ३१८ क्यूसेस पाण्याचा विसर्ग करण्यात आला होता. दरम्यान, रविवारी (ता. २३) पावसाने उघडीप दिली. गंगापूर धरणातून करण्यात येणारा पाण्याचा विसर्ग थांबविण्यात आलेला आहे. रविवारी दिवसभर ढगाळ वातावरण मात्र कायम होते.