Nashik Crime News : परप्रांतीय प्रेयसीसमवेत सिन्नरमध्ये राहताना तिच्या चारित्र्यावर संशय घेत गळा आवळून खून केल्याप्रकरणातील आरोपीला मुख्य जिल्हा न्यायाधीशांनी मरेपर्यंत जन्मठेप व १० हजारांच्या दंडाची शिक्षा ठोठावली आहे.

२०१९ मध्ये ही घटना सिन्नर शहरात घडली होती. (Accused in girlfriend murder case sentenced to life imprisonment nashik crime news)

दरवेश गेंदालाल चौरे (४०, मूळ रा. भोपाळ) असे आरोपीचे नाव आहे. सिन्नर पोलिसांत दाखल फिर्यादीनुसार, रेखा मेहरा (रा.भोपाळ) हिच्याशी आरोपी दरवेशचे प्रेमसंबंध होते. रेखा विवाहित व तिला एक मुलगी होती. दोघींना घेऊन तो सिन्नरमध्ये राहण्यास आला होता. संजीवनी नगरमध्ये भाड्याच्या खोलीत ते राहत होते.

मात्र दरवेश हा रेखाच्या चारित्र्यावर संशय घेत असे. त्यातून त्यांच्यात सतत वाद व्हायचे. २१ सप्टेंबर २०१९ रोजी आरोपी दरवेशने रेखाचा ओढणीने गळा आवळून खून केला. त्यानंतर घराला कुलूप लावून पसार झाला होता. मुलगी रिया शाळेतून घरी आली असता तिने आईचा शोध घेतला पण ती मिळून आली नाही.

त्यामुळे पोलिसांना बोलावून दरवाजा उघडला असता, रेखा बाथरूममध्ये मृत आढळली होती. याप्रकरणी सिन्नर पोलिसांत दरवेशविरोधात खुनाचा गुन्हा दाखल झाला होता. गुन्ह्याचा तपास तत्कालीन पोलिस निरीक्षक एस.पी. पाटील, उपनिरीक्षक सुदाम एखंडे यांनी करत दोषारोपपत्र न्यायालयात सादर केले.

खटला जिल्हा व सत्र न्यायालयाचे मुख्य न्यायाधीश एस.डी. जगमलानी यांच्यासमोर चालला. सरकार पक्षातर्फे सरकारी वकील ॲड. शिरिष कडवे यांनी १८ साक्षीदार तपासले. दोष सिद्ध झाल्याने न्या. जगमलानी यांनी आरोपीला मरेपर्यंत जन्मठेपेची शिक्षा सुनावली आहे.