National Youth Festival : दर बारा वर्षांनी भरणाऱ्या कुंभमेळ्याचा अनुभव गाठीशी असलेल्या नाशिकच्या प्रशासनाने राष्ट्रीय युवा महोत्सवाचा मिनी कुंभ यशस्वीरीत्या पार केला. पाच दिवसांच्या या महोत्सवातून नाशिकचे देशभर ‘ब्रँडिंग’ तर होईलच, याशिवाय नाशिकच्या युवकांमध्ये सकारात्मक भावना निर्माण करण्यास हा महोत्सव पूरक ठरेल.

महाराष्ट्रात २००७ नंतर आणि नाशिकमध्ये पहिल्यांदाच राष्ट्रीय युवा महोत्सव पार पडला. (administration of Nashik successfully conducted Mini Kumbh of National Youth Festival nashik news)

२७ व्या महोत्सवानिमित्त पंतप्रधान नरेंद्र मोदी, केंद्रीय क्रीडामंत्री अनुराग ठाकूर यांसह राज्याचे मुख्यमंत्री, उपमुख्यमंत्री नाशिकला येऊन गेले. राष्ट्रीय पातळीवर नेत्यांच्या येण्याने ‘नाशिकचे अंगण’ अधिक स्वच्छ व सुंदर झाले. रस्त्यांवरील खड्डे रात्रीतून भरल्या गेले; तर स्वागतासाठी सजलेल्या कमानींसोबत ‘बाभळीच्या झाडांना झेंडूच्या फुलांच्या माळा’ चिकटविण्यात आल्या.

पंचवटीत तर रस्तोरस्ती अशा स्वरूपाचे चित्र दिसून आले. आयोजकांना दोष द्यायचा तर त्यांनाही अवघ्या २० दिवसांत तयारी करण्याचे शिवधनुष्य पेलायचे होते. त्यामुळे त्यांनाही दोष देण्यात अर्थ नव्हता. रस्त्यांवरील दुभाजकांची रंगरंगोटी करताना स्वच्छतेकडे दुर्लक्ष करून धुळीवर रंग भरले जात होते. पण, नियोजनासाठी पुरेसा वेळच नसल्याने नाशिककरांनी त्याकडे डोळेझाक केली.

उद्‌घाटन सोहळा व्यवस्थितरीत्या पार पडल्यावर पोलिसांसह प्रशासनाने सुटकेचा निःश्वास टाकला. आता क्रीडा व युवक कल्याण विभागाला ‘चार’ दिवसांची कसोटी खेळायची होती. त्यासाठी निवडलेली ठिकाणे योग्य असल्याने फार कसरत झाली नाही; पण केंद्र सरकार आणि राज्यातील अधिकारी यांच्यात असमन्वय वेळोवेळी दिसून आला. सादरीकरणासाठी आलेल्या युवकांचा काही अंशी हिरमोड झाला.

परराज्यांतील काही विद्यार्थ्यांची गैरसोयवगळता भोजन, निवास आणि बसची व्यवस्था केंद्र सरकारने निश्चित करून दिलेली असल्याने त्याविषयी स्थानिकांना बोलण्याचा अधिकार उरलाच नाही. राहिली गोष्ट युवा दिनानिमित्त देण्यात येणाऱ्या राष्ट्रीय युवा पुरस्कार्थींची, तर त्यांना पंतप्रधानांच्या हस्तेच पुरस्कार हवे होते. पण, मंत्री हेही केंद्र सरकारचे प्रतिनिधी असतात, त्यामुळे पुरस्कार्थींचा आग्रह अनाठायी वाटतो.

देशाच्या ३२ राज्यांतून आलेले सात हजार युवक-युवती व त्यांचे प्रतिनिधी यांनी महाराष्ट्राची संस्कृती पाहिली. महोत्सवानिमित्त कुंभनगरीची सकारात्मक भावना घेऊन हे युवक मायदेशी परतणार आहेत. २०२७ च्या कुंभमेळ्यापूर्वीच नाशिकचे नाव देशाच्या कानाकोपऱ्यात पोहोचले, असेच यानिमित्त म्हणावे लागेल.