Nashik Crime : खरीप हंगामाच्या पार्श्वभूमीवर जिल्हा परिषदेच्या कृषी विभागाच्या जिल्हा भरारी पथकाकडून बनावट खते व बियाणे विक्रीवर कारवाई सुरू आहे.

कृषी विभागातील जिल्हा भरारी पथकास मिळालेल्या गुप्त माहितीच्या आधारे द्वारका परिसरातील अभिजित सीड्‌स प्रा. लि. बियाणे कंपनीत मान्यता नसलेली, तसेच मुदतबाह्य कांदा पिकाची सुमारे ५०० ग्रॅमची ८८५ पाकिटे (४४२.५ किलो बियाणे) जप्त करण्यात आली. (agriculture department action on expired 13 lakh seeds Nashik Crime)

हेही वाचा : Credit Card फसवणूक....काय घ्याल काळजी?

जप्त केलेल्या बियाण्यांची किंमत सुमारे १३ लाख सात हजार ६८० रुपये इतकी आहे. तपासणीच्या वेळेस सदरचे बियाणे विक्रीकरिता पॅकिंग करीत असल्याचे आढळले.

जिल्हा कृषी विकास अधिकारी कैलास शिरसाठ यांच्या नेतृत्वाखाली जिल्हा भरारी पथकातील कृषी उपसंचालक जगदीश पाटील, तंत्र अधिकारी (गुनि) संजय शेवाळे, जिल्हा मोहीम अधिकारी अभिजित जमधडे, तंत्र अधिकारी अभिजित घुमरे, विभागीय गुणवत्ता नियंत्रण निरीक्षक जितेंद्र पानपाटील, जगन सूर्यवंशी यांच्या पथकाने ही कारवाई केली.

सदर कारवाई विभागीय कृषी सहसंचालक मोहन वाघ व जिल्हा अधीक्षक कृषी अधिकारी विवेक सोनवणे यांच्या मार्गदर्शनाखाली करण्यात आली. या प्रकरणी भद्रकाली पोलिस ठाण्यात जिल्हा मोहीम अधिकारी जमधडे यांच्यातर्फे गुन्हा दाखल करण्याची प्रक्रिया सुरू आहे.