नाशिक : अंबड औद्योगिक वसाहतीतील एक्स्लो पॉइंट येथील बच्चू कर्डिल यांचा शुक्रवारी (ता. २५) रात्री खून झाला होता. याप्रकरणी अद्यापही पोलिसांच्या हाती ठोस धागेदोरे मिळून आलेले नाहीत. यासाठी मुंबईतून फॉरेन्सिक तज्ज्ञांचे एक पथकाला पाचारण करण्यात येणार आहे. तसेच, या घटनेतील चोरीला गेलेल्या कोठीचा शोध घेण्यासाठी पोलिसांनी परिसरातील विहिरी उपसल्या, ओढे-नाल्यांमध्ये शोध घेतला. परंतु, पोलिसांच्या हाती काहीही लागलेले नाही. (Ambad Kardile murder Case Forensic expert team called from Mumbai Nashik crime News psl98)

अज्ञात व्यक्तींनी धारदार शस्त्रांसह रॉडने वयोवृद्ध बच्चू कर्डिल यांच्या डोक्यावर वार करीत, त्यांचा खून केल्याची घटना घडली होती. संशयितांनी घरातून लहान कोठीसह पोबारा केला. याप्रकरणी गेल्या पाच दिवसात शहर पोलिसांनी विविध पथके तयार करून तपास सुरू केला आहे. परंतु अद्यापही पोलिसांच्या हाती महत्त्वाचे धागेदोरे लागू शकलेले नाहीत. संशयितांनी नेलेली कोठी शोधण्यासाठी पोलिसांनी परिसरातील विहिरींचा उपसा केला. ओढे- नाल्यांची तपासणी केली. त्यासाठी मेटल डिटेक्टरचा वापरही केला.

मात्र, पोलिसांच्या हाती काहीही लागलेले नाही. परिसरात कोठेही सीसीटीव्ही नसल्याने संशयितांची माहिती मिळत नाही. तांत्रिक विश्‍लेषणानुसार तपास सुरू आहे. सदर घटनेसंदर्भात पोलिस आयुक्त जयंत नाईकनवरे यांनी वरिष्ठ अधिकाऱ्यांची बैठक घेत तपासाचा आढावाही घेतला. त्यानंतर मुंबईतील फॉरेन्सिक तज्ज्ञांचे एक पथकाला बोलाविण्यात येणार असल्याचे संकेत आयुक्तांनी दिले आहेत.

हेही वाचा : भारतीय उत्पादनांच्या खरेदीतली वाढ बनवेल देशाला आर्थिक महासत्ता...

त्यामुळे खुनाच्या बारीकसारीक तथ्यातून माग काढण्याचा प्रयत्न पोलिस करीत आहेत. तर, पळविण्यात आलेल्या कोठीमध्ये कर्डिल यांच्या मालमत्तेची कागदपत्रे असल्याचे सांगितले जाते. त्यावरून सदरचा प्रकार मालमत्तेचा वा जमिनीच्या व्यवहारातून झाला असावा असा प्राथमिक अंदाज व्यक्त केला जात आहे. परंतु, हे सारे गुन्ह्याची उकल झाल्यानंतरच स्पष्ट होऊ शकणार आहे.

खोली सीलबंद

ज्या ठिकाणी बच्चू कर्डिल यांचा खून झाला, ती खोली पोलिसांनी सीलबंद केलेली आहे. घटनेनंतर पोलिसांच्या श्‍वानपथकही घराच्याच आसपासच्या परिसरात घुटमळले होते. स्थानिक फॉरेन्सिकच्या हाती काहीही लागलेले नसल्याने विशेष पथकाकडून पुन्हा फॉरेन्सिक तपास केला जाणार आहे. त्यातून पोलिसांच्या हाती काही धागेदोरे लागण्याची शक्यता आहे.