नाशिक : केंद्रीय गृहमंत्री अमित शहा यांचा नाशिक जिल्हा दौरा काही अपरिहार्य कारणास्तव रद्द करण्यात आला असल्याची माहिती जिल्हा प्रशासनाकडून देण्यात आली आहे आहे. अमित शहा यांच्या अनुपस्थितीत केंद्रीय गृहराज्यमंत्री नित्यानंद राय हे जिल्हा दौर्‍यावर येत आहे. आंतरराष्ट्रीय योग दिन आणि स्वातंत्र्याच्या अमृत महोत्सवनिमित्ताने केंद्रीय गृहमंत्री अमित शहा येणार होते. या पार्श्वभूमीवर जिल्हा प्रशासनाकडून त्रंबकेश्वर येथील मंदिर परिसरात आवश्यक ती सर्व पूर्वतयारी करण्यात येत होती.

अमित शहा यांच्या दौऱ्याच्या पार्श्वभूमीवर केंद्रीय राखीव पोलीस दलाकडून त्यांच्या सुरक्षिततेचा संपूर्ण आढावा देखील घेतला जात होता. केंद्रीय आरोग्य राज्यमंत्री डॉ. भारती पवार यांनी देखील जिल्हाधिकारी कार्यालयात आढावा बैठक देत अधिकारी व प्रशासन यांना दौऱ्याच्या पार्श्वभूमीवर आवश्यक त्या सर्व उपाययोजना करण्याच्या सूचना देखील दिल्या होत्या. मात्र रविवार (ता.१९) सायंकाळी उशिरा अमित शहा यांचा दौरा रद्द झाला असल्याची माहिती प्रशासनाकडून मिळाली. अमित शहा ऐवजी केंद्रीय गृहराज्यमंत्री नित्यानंद राय जिल्हा दौऱ्यावर येऊन कार्यक्रमांना उपस्थित राहणार आहे.