नाशिक : ब्रम्हगिरी म्हणजे सह्याद्री व सह्याद्री म्हणजे महाराष्ट्र, पर्यावरणाच्या अस्मितेला जर विकासाच्या नावाखाली किंवा धनदांडग्या प्रवृत्तींकडून धोका पोहोचत असेल तर ते खपवून घेतले जाणार नाही, त्यामुळे ब्रम्हगिरी पर्वताच्या रक्षणासाठी नाशिकच्या पर्यावरणप्रेमी कार्यकर्त्यांनी ज्येष्ठ समाजसेवक अण्‍णा हजारे यांना साकडे घातले. हजारे यांनी एक दिवस पर्यावरणीय आंदोलनासाठी देण्याचे आश्वासन दिले.

हजारे यांच्या हस्ते यावेळी ‘मी ब्रम्हगिरी‘ या टी शर्टचे अनावरण करण्यात आले. कृती समितीचे निशिकांत पगारे, मनोज साठे, योगेश बर्वे आदी उपस्थित होते. हजारे यांनी आंदोलनात सातत्य ठेवण्याची सूचना केली. सामाजिक, स्वयसेवी पर्यावरणीय संस्था व संघटनांनी जनचळवळ उभारावी. मोबाइल व सोशल मीडियाचा वापर मोठ्या प्रमाणात करावा. आंदोलन यशस्वी करायचे असेल तर नागरिकांचा सहभाग जरूर घ्यावा. जनजागृती व प्रबोधन मोठ्या प्रमाणात केले जावे. आंदोलनात सातत्य ठेवण्यातून हे शक्य असल्याचे श्री. हजारे यांनी सांगितले.