Ashadhi Wari 2023 : आषाढी एकादशीसाठी तालुक्यासह कसमादेतील हजारो भाविक दिंडी यात्रेने पंढरपूरकडे जात आहेत. २९ जूनला आषाढी एकादशी आहे. या पार्श्वभूमीवर हजारो भाविक बसने पंढरपूरला विठुरायाच्या दर्शनासाठी जातात.

पंढरपूरला जाणाऱ्या भाविकांसाठी येथील आगाराने मागेल तिथून बसची सुविधा हा उपक्रम हाती घेतला आहे. दरम्यान येथील आगारातून २३ जूनपासून मालेगाव ते पंढरपूर बसेस धावणार आहेत. (Ashadhi Wari 2023 Bus facility from demanded place for Pandharpur Yatra nashik news)

हेही वाचा : Credit Card फसवणूक....काय घ्याल काळजी?

पंढरपूरला जाण्यासाठी किमान ४० ते ४५ प्रवासी एकत्र आल्यास थेट मागेल त्या ठिकाणाहून बसची सुविधा उपलब्ध करून दिली जाणार आहे. भाविकांच्या सोयीसाठी त्यांना त्यांच्या गावातून देखील बस उपलब्ध करून दिली जाईल.

४० ते ४५ प्रवासी एकत्र आल्यास गावातून थेट पंढरपूरला व पंढरपूरहून थेट गावात आणून पोचविले जाईल. या उपक्रमाचा भाविकांनी लाभ घेण्याचे आवाहन करण्यात आले आहे. येथील आगारातून २३ ते २६ जून या कालावधीत रोज तीन तर २७ जूनपासून दिवसभरात दहा जादा बसेस सोडल्या जाणार आहेत.

बसस्थानकातील प्रवाशांची गर्दी लक्षात घेऊन तत्काळ बसेस पंढरपूरसाठी उपलब्ध करून दिल्या जाणार असल्याचे आगाराकडून सांगण्यात आले.