नाशिक : दुचाकी चोरट्यांची मजल आता थेट पोलिसांचे गस्ती वाहन असलेली दुचाकी चोरून नेण्यापर्यंत पोचली आहे. तर, याशिवाय शहर हद्दीतून तीन दुचाकी चोरट्यांनी लंपास केल्या आहेत. दिवसेंदिवस दुचाकी चोरीला जाण्याचे प्रकार सातत्याने सुरू असून, पोलिसांची ॲन्टी व्हेईकल थीफ स्क्वॉड हे प्रकार रोखण्यात अपयशी ठरल्याचेच चित्र आहे. (Bike theft session continues government bike of police theft Nashik Crime News)

हवालदार नरेंद्र शिवाजी चौधरी (रा. पोलिस हाउसिंग सोसायटी, आडगाव) यांच्या फिर्यादीनुसार, त्यांना शहरात गस्त घालण्यासाठी सरकारी दुचाकी (एमएच- १५ - ८२०४) देण्यात आलेली आहे. सदर दुचाकी त्यांनी शुक्रवारी (ता. ६) वॉशिंगसाठी आडगाव येथील डी- मार्टशेजारी असलेल्या ऋतुजा वॉशिंग सेंटर येथे लावली होती.

ती ते परत घेण्यासाठी गेले असता, चोरी गेली होती. याप्रकरणी आडगाव येथे गुन्हा दाखल झाला आहे. कैलास गणपत पगारे (रा. अपेक्षा अपार्टमेंट, जेल रोड) यांची दुचाकी (एमएच- १५- बीक्यू- ४५१६) गेल्या ९ नोव्हेंबरला गौरी पटांगणावरून अज्ञात चोरट्याने लंपास केली. याप्रकरणी पंचवटी पोलिसात गुन्हा दाखल करण्यात आला आहे.

हेही वाचा : द मिसिंग टाइल सिंड्रोम ठेवा आपल्यापासून दूर

अमित प्रकाश अग्रवाल (रा. गणेश भवन, रविवार पेठ) यांची मोपेड (एमएच- १५- एचएक्स- ४७७४) ३ डिसेंबरला पहाटे अज्ञात चोरट्याने राहत्या इमारतीच्या पार्किंगमधून चोरून नेली. याप्रकरणी सरकारवाडा पोलिसात गुन्हा दाखल करण्यात आला आहे.

जोएब हनिफ शेख (रा. रेणुकानगर सोसायटी, वडाळा नाका) यांची मोपेड (एमएच- १५-१७९२) ४ डिसेंबरला मध्यरात्री अज्ञात चोरट्याने राहत्या इमारतीच्या पार्किंगमधून चोरून नेली. याप्रकरणी मुंबई नाका पोलिसात गुन्हा दाखल करण्यात आला आहे.