नाशिक : तिघा निरीक्षकांच्या त्रासाला कंटाळून घंटागाडी कर्मचाऱ्याने केलेल्या आत्महत्येप्रकरणी (Suicide) तिघा संशयितांविरोधात उपनगर पोलिसांत आत्महत्येस प्रवृत्त केल्याचा गुन्हा (Crime) अखेर दोन दिवसांनी दाखल झाला. (Case filed against 3 suspects in Ghantagadi employees suicide case Nashik News)

किरण माणिक पुराणे (वय २६, रा. आगरटाकळी, जेल रोड) या घंटागाडी कर्मचाऱ्याने सोमवारी (ता. २०) राहत्या घरी गळफास घेत आत्महत्या केली होती. या प्रकरणी जतीन दाणी (४५, रा. पंचवटी), रमीज मणियार (३८, रा. जुने नाशिक), सुमीत कोष्टी (३२, रा. सिडको) या तिघांविरोधात गुन्हा दाखल झाला आहे. अरुण पुराणे यांनी दिलेल्या फिर्यादीनुसार, किरणला तिघा संशयित त्रास देत सतत पैशांची मागणी करीत होते. पैसे न दिल्यास कामावर न घेण्याची धमकी देत, तसेच पगार झाल्यावर पार्टी मागत होते. या सततच्या त्रासाला कंटाळून किरणने सोशल मीडियावर तिघा संशयितांची नावे घेत आत्महत्या करीत असल्याचा संदेश व्हायरल केला होता. या प्रकरणी तिघा संशयितांविरोधात गुन्हा दाखल झाला.

घंटागाडी कर्मचाऱ्यांमध्ये असंतोष

घंटागाडी कर्मचाऱ्यांमध्ये छळवणुकीबाबत नेहमीच असंतोष राहिला आहे. किरणच्या आत्महत्येनंतर कर्मचारी संतप्त झाले होते. नातगलांनी कारवाईची मागणी केली होती. कर्मचाऱ्यांना निरीक्षक, ठेकेदाराकडून सतत त्रास दिला जात असल्याच्या नेहमी तक्रारी होत आहेत, मात्र त्याकडे सोयीस्कर दुर्लक्ष केले जाते.