नाशिक : जिल्ह्यात उद्योगांच्या वृद्धीसाठी आवश्यक पायाभूत सुविधा उपलब्ध करून देण्यासाठी शासन कटिबद्ध आहे. स्थानिक औद्योगिक क्षेत्रातील समस्यांबाबत जिल्हाधिकाऱ्यांनी उद्योजकांसोबत वेळोवेळी बैठक घेत कालबद्धरित्या प्रश्नांचे निराकरण करावे, असे निर्देश मुख्यमंत्री एकनाथ शिंदे यांनी शनिवारी (ता.१९) दिले.

नाशिक औद्योगिक व लघु व मध्यम उद्योग (एसएमई) यांच्या आयोजित परिषदेत मुख्यमंत्री शिंदे यांनी ध्वनीचित्रफितीद्वारे संवाद साधला. (CM Eknath Shinde Statement Committed to infrastructure for industries Nashik News)

याप्रसंगी एसएमई चेंबर ऑफ इंडियाचे संस्थापक तथा अध्यक्ष चंद्रकांत साळुंखे, एसबीआय बँकेच्या महाव्यवस्थापक मेरी सागाया, पश्‍चिम क्षेत्रातील कौन्सिलचे अध्यक्ष श्रीराम महानकालीवार, एसएमईच्या उपमुख्य कार्यकारी अधिकारी डॉ. दीप्ती पाटील आदी उपस्थित होते.

मुख्यमंत्री शिंदे म्हणाले, की लॉजिस्टीक पार्क, एक्झिबिशन सेंटर्स, इलेक्ट्रिकल हब, इंडस्ट्रिअल पार्क या रखडलेल्या प्रकल्पांना चालना देण्यासाठी केंद्र सरकारकडे सातत्याने पाठपुरावा सुरु आहे. उद्योग उभारणीसाठी उद्योजकांना जागा वाटप प्रक्रिया जलद, सुलभतेने केली जाते आहे. यावेळी उपस्थित मान्यवरांनी उद्योजकांशी बँकेशी संबंधित येणाऱ्या समस्यांबाबत संवाद साधून मार्गदर्शन करण्यात आले.