CM Fadnavis Lays Foundation for 'Chakra' at MUHS: महात्मा फुले जनआरोग्य योजनेच्या माध्यमातून राज्यातील १३ कोटी जनतेला पाच लाखांपर्यंत आरोग्य विम्याचे संरक्षण सरकारने दिले आहे. परंतु, आरोग्य क्षेत्रातील किमान ५० टक्के शस्त्रक्रिया या प्राथमिक आरोग्य केंद्र व उपकेंद्रांमध्ये व्हायला हव्यात. त्यादृष्टीने पुढील चार वर्षात या आरोग्य केंद्रांचे बळकटीकरण करण्यात येणार आहे. महाराष्ट्र आरोग्य विज्ञान विद्यापीठ व आरोग्य विभागांना त्याचे लक्ष्य दिल्याचे मुख्यमंत्री देवेंद्र फडणवीस यांनी सांगितले.

महाराष्ट्र आरोग्य विज्ञान विद्यापीठात सेंटर ऑफ एक्सलन्स ‘चक्र’ (सेंटर फॉर हेल्थ,अप्लाईड नॉलेज ॲण्ड रिसर्च ॲटॉनॉमी) याचे भूमिपूजन रविवारी फडणवीस यांच्या हस्ते करण्यात आले.

मुख्यमंत्री फडणवीस म्हणाले, ‘सेंटर ऑफ एक्सलन्स’च्या माध्यमातून आरोग्य विद्यापीठ हे ’हब’ स्थापित करण्यात आले आहे. वैद्यकीय महाविद्यालय ’स्पोक’ म्हणून कार्यरत राहतील. विद्यापीठांनी अन्य संस्थांना मार्गदर्शक म्हणून काम करावे इतके आदर्श काम करणे अपेक्षित आहे.

विद्यापीठात ’चक्र’ द्वारे जनुकीय आरोग्य व समाजोपयोगी संशोधनावर अधिक भर द्यावा, ज्याचा उपयोग सर्वसामान्य नागरिकांना होईल, असे आवाहनही त्यांनी केले. कुलगुरू लेफ्टनन्ट जनरल माधुरी कानिटकर (निवृत्त) यांनी प्रास्ताविक केले.