जुने नाशिक : काँग्रेस नेते राहुल गांधी यांच्याविरुद्ध फेसबुकवर आक्षेपार्ह पोस्ट टाकणाऱ्याविरुद्ध भद्रकाली पोलिस ठाण्यात तक्रार दाखल झाली. स्वप्नील मनोज पांडे (रा. सटाणा) असे संशयिताचे नाव आहे.

राहुल गांधी यांच्याविरुद्ध अतिशय गलिच्छ भाषेत लिहिलेली पोस्टमुळे शहर काँग्रेस पार्टीच्या पदाधिकाऱ्यांमध्ये संतापाची लाट निर्माण झाली. भद्रकाली पोलिस ठाणे गाठत संशयित तरुणाविरुद्ध काँग्रेस अल्पसंख्याक विभागाचे शहराध्यक्ष हनिफ बशीर यांनी तक्रार दाखल केली. संशयितास ताब्यात घेत त्यावर कडक कारवाई करण्याची मागणी केली.

भद्रकाली पोलिसांनी तक्रार दाखल करून घेत सायबर क्राईम विभागाच्या माध्यमातून तपास सुरू करण्याचे आश्वासन संतप्त पदाधिकाऱ्यांना दिले. या वेळी शहर काँग्रेस सेवादलाचे शहराध्यक्ष वसंत ठाकूर, विजय पाटील, ॲड. सागर वाहूळ, अशोक लहामगे, अनिल बहोत, सिद्धार्थ गांगुर्डे, नीतेश निकुंभ, इम्रान अन्सारी, दाऊद शेख, संतोष हिवाळे आदी उपस्थित होते.