नाशिक :  स्मार्टसिटीअंतर्गत शहरात तयार करण्यात आलेल्या स्मार्ट रस्त्याच्या कामाला विलंब झाल्याने ठेकेदारावर लावलेला पावणेदोन कोटींचा दंड वसूल करणे तर सोडाच उलट ठेकेदार कंपनीनेच रस्त्यासाठी जागा न मिळाल्याने आठ कोटींचे नुकसान झाल्याचा दावा करत लवादाकडे दाद मागण्याची तयारी केली आहे. त्यामुळे स्मार्टसिटी कंपनी तोंडावर पडण्याची वेळ आली आहे.

स्मार्ट रस्त्यासह कंपनीचे सीईओ प्रकाश थविल यांच्या भूमिकेसह त्यांची बदली होत नसल्याने संताप व्यक्त करणाऱ्या संचालकांना शब्द देण्याऐवजी कंपनीचे अध्यक्ष सीताराम कुंटे यांनी थविल यांची पाठराखण केल्याने आश्‍चर्य व्यक्त केले जात आहे. 

आठ कोटी रुपये नुकसान झाल्याचा दावा

अशोक स्तंभ ते त्र्यंबक नाका सिग्नलदरम्यान तयार करण्यात आलेल्या स्मार्ट रस्त्याच्या कामात ठेकेदाराने दिरंगाई केल्याने दंडात्मक कारवाईची एक कोटी ७० लाखांची रक्कम देयकांतून वजावट करण्यात आल्याने कंत्राटदाराने सेटलमेंट ऑफ डिस्पूट कलमाखाली लवादाकडे धाव घेत उलट वेळेत जागा न मिळाल्याने आठ कोटी रुपये नुकसान झाल्याचा दावा केला. त्यासाठी स्मार्टसिटी कंपनीला र्बिट्रेशन अँड कौन्सिलिएशन ॲक्टअंतर्गत लवाद नेमणे आवश्यक असल्याचे सीईओ थविल यांनी सांगताच संचालकांमध्ये आश्‍चर्य व्यक्त करण्यात आले. प्रारंभी नूतन कार्यालयाचे उद्घाटन करण्यात आले. 

हेही वाचा - शुभमंगल सावधान आणि 'त्यांच्या' पासूनही जरा सावधान! टार्गेट सप्तपदीचा मुहूर्त

सल्लागारांवर पुन्हा कोटींचा खर्च 

स्मार्टसिटीअंतर्गत शहरात तीन जलकुंभांची निर्मिती केली जाणार असून त्यासाठी २१.६६ कोटींच्या निविदेला मंजुरी देण्यात आली. याअंतर्गत पंचवटी डेपो, गोल्फ क्लब येथे वीस लाख लिटर क्षमतेच्या दोन व जुने नाशिक येथील सादिक शहा येथे १७ लाख लिटर क्षमतेचा एक असे तीन जलकुंभ उभारले जाणार आहे. जुने नाशिक येथील दीक्षित वाडा येथे वीस लाख लिटर क्षमतेचा भूमिगत जलकुंभ व पंप हाउस उभारला जाणार आहे. स्मार्टसिटी कंपनीकडे प्रकल्पांसाठी सल्लागार कंपनी असताना नव्याने काढलेल्या निविदांसाठीही पुन्हा सल्लागार नियुक्त करण्याच्या मागणीला सदस्यांनी विरोध दर्शविला. 

गरजूंना कौशल्य प्रशिक्षण 

गरजूंना कौशल्य प्रशिक्षण देण्यासाठी लाइट हाउस कम्युनिटिज फाउंडेशन या स्वयंसेवी संस्थेसोबत सामंजस्य करार करण्यास मान्यता देण्यात आली. संस्थेच्या माध्यमातून गरजूंचा शोध घेऊन त्यांचे समुपदेशन करून त्यांच्या कलानुसार प्रशिक्षण व रोजगार उपलब्ध करून दिला जाणार आहे. 

थविलांची पाठराखण 

ऑगस्टमध्ये बदली होऊनही सीईओ थविल अद्यापही स्मार्टसिटी कंपनीवर कार्यरत असल्याने संचालकांनी आक्षेप घेतला. प्रकल्पांची धिमी गती, लोकप्रतिनिधींचा अनादर याबाबत महापौर कुलकर्णी यांनी तक्रार केली. विरोधी पक्षनेते बोरस्ते यांनी प्रकल्पांच्या अंमलबजावणीवर हरकत घेतली. थविल यांची बदलीची मागणी केली परंतु अध्यक्ष कुंटे यांनी थविल यांची पाठराखण करत त्यांना अभय दिला. 

हेही वाचा - निनावी पत्रावरून पोलीसांनी लावला शोध, हाती लागली धक्कादायक माहिती

नाशिक म्युनिसिपल स्मार्टसिटी डेव्हलपमेंट कॉर्पोरेशन लिमिटेडची चौथी वार्षिक बैठक सीताराम कुंटे यांच्या अध्यक्षतेखाली नूतन कार्यालयात झाली. याप्रसंगी केंद्र सरकारचे दिल्लीचे प्रतिनिधी रामचरण मीणा, संचालक भास्कर मुंडे, विभागीय आयुक्त राधाकृष्ण गमे, जिल्हाधिकारी सूरज मांढरे, पोलिस आयुक्त दीपक पांडेय, महापौर सतीश कुलकर्णी, उपमहापौर भिकूबाई बागूल, सभागृहनेते सतीश सोनवणे, विरोधी पक्षनेते अजय बोरस्ते, संचालक गुरुमितसिंग बग्गा, तुषार पगार आदी उपस्थित होते.