नाशिक : (मालेगाव) जिल्ह्यात कोरोनाचे संशयित 23 रुग्ण आतापर्यंत आढळून आले. त्यांपैकी 16 रुग्णांचे अहवाल निगेटिव्ह आले. सहा रुग्णांच्या अहवालाची प्रतीक्षा आहे. एका रुग्णाचे नमुने आज पाठविण्यात येतील. जिल्ह्यात कोरोनाचा एकही रुग्ण नाही. नागरिकांनी कोरोनाला घाबरून न जाता आवश्‍यक ती काळजी घ्यावी, आवश्‍यकता नसेल तर गर्दीच्या ठिकाणी जाणे टाळावे. आरोग्य विभागाने याविषयी जनजागृती करावी. जिल्हा आरोग्य विभाग व प्रशासन सज्ज आहे, असे कृषिमंत्री दादा भुसे यांनी सोमवारी (ता. 16) शासकीय विश्रामगृहावर पत्रकार परिषदेत सांगितले. 

सकाळी शासकीय विश्रामगृहात आढावा बैठक पार

श्री. भुसे यांच्या अध्यक्षतेखाली सकाळी शासकीय विश्रामगृहात आढावा बैठक पार पडली. या वेळी अपर जिल्हाधिकारी लक्ष्मण राऊत, अपर पोलिस अधीक्षक संदीप घुगे, प्रांताधिकारी विजयानंद शर्मा, महापालिकेचे उपायुक्त नितीन कापडणीस, रोहिदास दोरकुळकर, सहाय्यक आयुक्त राहुल मर्ढेकर, जिल्हा रुग्णालयाचे निवासी वैद्यकीय अधिकारी डॉ. अनंत पवार, महापालिका आरोग्याधिकारी डॉ. सायिका अन्सारी, डॉ. एम. बी. त्रिभुवन, डॉ. हितेश महाले, तहसीलदार चंद्रजित राजपूत, गटविकास अधिकारी जितेंद्र देवरे आदी उपस्थित होते. श्री. भुसे म्हणाले, की कोरोना विषाणूच्या पार्श्‍वभूमीवर नागरिकांनी खबरदारी घ्यावी. बचावासाठी प्रतिबंधात्मक उपाययोजना महत्त्वाच्या आहेत. या पार्श्‍वभूमीवर आरोग्य विभागाच्या अधिकारी व कर्मचाऱ्यांनी सतर्क राहावे. त्यांच्या सुट्या, रजा रद्द करण्यात आल्या आहेत. 

मास्क, सॅनिटायझरचा काळा बाजार होणार नाही याची दक्षता

जिल्हा रुग्णालय, येथील सामान्य रुग्णालयात कोरोनाची माहिती देण्यासाठी कक्ष व वैद्यकीय तज्ज्ञांची नियुक्ती केली आहे. प्रत्येक विभागाने आढावा बैठक घेऊन गावागावात जनजागृती करावी. मास्क, सॅनिटायझरचा काळा बाजार होणार नाही अशी दक्षता घ्यावी. संबंधित विक्रेत्यांची महसूल, पोलिस आणि महापालिका प्रशासनाने संयुक्त बैठक बोलवावी. मालेगाव व नाशिक येथील रुग्णालयात विलगीकरण कक्ष कार्यान्वित करण्यात आला आहे. तेथे आवश्‍यक सोयीसुविधा उपलब्ध करून द्याव्यात. आवश्‍यकता भासल्यास खासगी वैद्यकीय व्यावसायिक व रुग्णालयांची मदत घ्यावी, असेही निर्देश त्यांनी दिले. या वेळी डॉ. पवार, डॉ. महाले, तालुका आरोग्याधिकारी डॉ. शैलेश निकम, डॉ. अन्सारी यांनी कोरोना प्रतिबंधासाठी आरोग्य विभागातर्फे सुरू असलेल्या उपाययोजनांची माहिती दिली. 

हेही वाचा > 'ती' आडलेल्या अवस्थेत...पण, काय अन् कसं करायचं 'त्यांना' काहीच माहिती नव्हतं...शेवटी

धुरळणी, फवारणी करण्यात येणार

मालेगाव शहरात परराष्ट्रातून 16 नागरिक आले. त्यांना क्वॉरटाइन करण्याच्या सूचना दिल्या आहेत. दोन आठवडे त्यांच्यावर देखरेख ठेवण्यात येणार आहे. संशयित लक्षणे आढळून आल्यानंतरच तपासणीसाठी स्वॅब घेण्यात येतात. येथील सामान्य व वाडिया रुग्णालयात विलगीकरण (आयसोलेशन) कक्ष आहे. सोयगाव, मदनीनगर येथे कक्ष सुरू झाला आहे. आवश्‍यक तेथे धुरळणी, फवारणी करण्यात येणार आहे.  

हेही वाचा > घरी जायची 'त्याला' ओढ...पण, रस्त्यात मृत्यू उभा ठाकलेला....