नाशिक : सलग दुसऱ्या दिवशी नव्‍याने आढळलेल्‍या कोरोना बाधितांपेक्षा बरे झालेल्‍या रूग्‍णांची संख्या अधिक राहिली. तर सलग चौथ्या दिवशी नव्‍याने आढळणार्या बाधितांची संख्या एक हजारपेक्षा कमी राहिली आहे. मंगळवारी (ता.६) दिवसभरात नव्‍याने ८७२ बाधित आढळून आले. तर ९८३ रूगणांनी कोरोनावर मात केली आहे. बारा रूग्‍णांचा कोरोनामुळे मृत्‍यू झालेला आहे.

दिवसभरात आढळले ८७२, तर ९८३ कोरोनामुक्‍त, बारा मृत्‍यू

मंगळवारी आढळलेल्‍या कोरोना बाधितांमध्ये नाशिक शहरातील ५८९, नाशिक ग्रामीणचे २३४, मालेगावचे २८ तर जिल्‍हाबाह्य २१ रूग्‍णांचा समावेश आहे. तर कोरोनामुक्‍त झालेल्‍या रूग्‍णांमध्ये नाशिक शहरातील ३३५, नाशिक ग्रामीणचे ६०२ आणि मालेगावच्‍या ४६ रूग्‍णांनी कोरोनावर मात केली आहे. दिवसभरातील बारा मृत्‍यूंमध्ये नाशिक शहरातील सात, नाशिक ग्रामीणच्या पाच रूग्‍णांचा कोरोनामुळे मृत्‍यू झाल्‍याची नोंद आहे. यातून जिल्‍ह्‍यातील एकूण बाधितांचा आकडा ८१ हजार ८९५ झाला आहे. यापैकी ७१ हजार २५५ रूग्‍णांनी कोरोनावर मात केली असून, १ हजार ४६३ रूग्‍णांचा मृत्‍यू झाला आहे. सद्य स्‍थितीत ९ हजार १७७ बाधितांवर उपचार सुरू आहेत. दिवसभरात दाखल झालेल्‍या संशयितांची संख्या लक्षणीय राहिली. नाशिक महापालिका रूग्‍णालये व गृहविलगीकरणात १ हजार ४८०, नाशिक ग्रामीण रूग्‍णालये व गृहविलगीकरणात १६५, मालेगाव रूग्‍णालये व गृहविलगीकरणात १३, डॉ. वसंत पवार वैद्यकीय महाविद्यालयात १५ संशयित दाखल झाले आहेत. जिल्‍हा रूग्‍णालयात आज एकही संशयित दाखल झाला नाही. सायंकाळी उशीरापर्यंत १ हजार ८८९ अहवाल प्रलंबित होते. यापैकी १ हजार २०३ अहवाल नाशिक ग्रामीणचे आहेत.

शहरातील कोरोनामुक्‍तांची संख्या पन्नास हजार

जिल्‍ह्‍यातील सर्वाधिक रूग्‍ण नाशिक महापालिका हद्दीत आढळून आले आहेत. या परीसरात आतापर्यंत ५५ हजार ०७७ कोरोना बाधित आढळून आले आहेत. यापैकी ५० हजार ००९ रूग्‍णांनी कोरोनावर मात केलेली आहे. ७८३ रूग्‍णांचा मृत्‍यू झाला असून, शहरातील ४ हजार २८५ बाधितांवर सध्या उपचार सुरू आहेत.