नाशिक : चार दिवसांपासून जिल्‍ह्यात नव्‍याने आढळणाऱ्या दैनंदिन कोरोनाबाधितांची संख्या शंभरापेक्षा अधिक राहत होती. शुक्रवारी (ता. १३) जिल्‍ह्यात ७८ रुग्‍णांचे अहवाल पॉझिटिव्‍ह आले, तर ७३ रुग्‍णांनी कोरोनावर यशस्‍वी मात केली. दोन बाधितांचा उपचारादरम्‍यान मृत्‍यू झाला. यातून ॲक्‍टिव्‍ह रुग्‍णसंख्येत तीनने वाढ झाली असून, सद्यःस्‍थितीत जिल्‍ह्यात एक हजार १२७ बाधितांवर उपचार सुरू आहेत.

शुक्रवारी नाशिक महापालिका हद्दीतील ३५, नाशिक ग्रामीणमधील ३२, मालेगावच्‍या एकासह जिल्‍हाबाहेरील दहा बाधितांचे अहवाल पॉझिटिव्‍ह आले. दुसरीकडे ७३ रुग्‍णांनी कोरोनावर यशस्‍वी मात केली. जिल्‍ह्यात दोन रुग्‍णांचा कोरोनाने बळी घेतला. यात प्रत्‍येकी एक मृत नाशिक शहर व नाशिक ग्रामीणमधील आहे.

यापूर्वी ८ ऑगस्‍टला जिल्‍ह्यात ९९ कोरोनाबाधित आढळले होते. सायंकाळी उशिरापर्यंत ९७६ रुग्‍णांना अहवालाची प्रतीक्षा होती. यापैकी नाशिक ग्रामीणमधील ६५५, नाशिक शहरातील १९१, मालेगावच्‍या १३० रुग्‍णांचे अहवाल प्रलंबित होते. जिल्‍हाभरातील रुग्‍णालये व गृहविलगीकरणात ४९९ रुग्‍ण दाखल झाले. यापैकी नाशिक महापालिका क्षेत्रातील ४७४ रुग्‍णांचा समावेश आहे. जिल्‍हा रुग्‍णालयात पाच, डॉ. वसंतराव पवार वैद्यकीय महाविद्यालयात एक रुग्‍ण दाखल झाला. नाशिक ग्रामीणमधील १९ रुग्‍णांचा समावेश आहे.