नाशिक : शहरात लसीकरण (Corona Vaccination) केंद्राला मंजुरी मिळाल्याचा गाजावाजा करणाऱ्या नगरसेवकांच्या उत्साहाचा फुगा शनिवारी (ता. ३) केंद्रावरील वाढलेली गर्दी व अनेकांना लस न घेताच परतावे लागल्याने फुटला. सत्तर केंद्रांवर प्रत्येकी १४० लसींचा पुरवठा करण्यात आला. अवघ्या दोन तासांतच लसींचा साठा संपुष्टात आल्याने सकाळपासून केंद्रांवर रांगा लावलेल्या नागरिकांना मनस्ताप सहन करावा लागला. (corona-vaccine-shortage-in-nashik-marathi-news)

केंद्र मंजूर पण लसच उपलब्ध नाही

शहरात १६ जानेवारीपासून लसीकरण मोहिमेला सुरवात करण्यात आली. सुरवातीला फ्रंटलाईन वर्कर, आरोग्य कर्मचारी व सरकारी कर्मचाऱ्यांचे लसीकरण झाले. त्यानंतर ६५ वयोगटांपुढील लसीकरणाला सुरवात झाली. ४५ पुढील वयोगटांसाठी नंतर लसीकरणाची मोहीम राबविण्यात आली. १ मेपासून १८ ते ४४ वयोगटांसाठी लसीकरणाची घोषणा करण्यात आली. परंतु मेच्या पहिल्या आठवड्यामध्येच लसीकरण मोहिमेचा बोजवारा उडाला. त्यानंतर पुन्हा निर्णय मागे घेताना ४५ वयोगटांपुढील नागरिकांसाठीच लसीकरण मोहीम सुरू ठेवली. आता पुन्हा गेल्या काही दिवसांपासून सरसकट १८ वयोगटांपुढील नागरिकांसाठी लसीकरण खुले करण्यात आले. त्यानुसार नागरिकांची गर्दी वाढणार असल्याने नगरसेवकांनी त्यांच्या प्रभागांमध्ये लसीकरण मंजूर करून घेतले. केंद्र मंजूर झाले तरी लस उपलब्ध होईल की नाही, याबाबत साशंकता होती. त्याप्रमाणेच घडले. अनेक केंद्रांवर सकाळी ६ पासून नागरिकांनी रांगा लावल्या, मात्र पहिल्या शंभर लोकांनाच लस मिळाल्याने उर्वरित नागरिकांना माघारी फिरावे लागले.

प्रत्येक केंद्रावर १४० डोस

महापालिकेने सुरवातीला ३१ केंद्रे घोषित केली होती. परंतु नगरसेवकांच्या आग्रहाखातर ४१ केंद्रे वाढविण्यात आली. त्यानुसार प्रत्येक केंद्रावर लस समप्रमाणात वाटपाचे नियोजन करण्यात आले होते. शनिवारी महापालिकेला जिल्हा रुग्णालयाकडून अकरा हजार ८० लस प्राप्त झाल्या. त्यानुसार सत्तर लस केंद्रांवर प्रत्येकी १४० लसचे वाटप करण्यात आले. एकूण ७० लसीकरण केंद्रांपैकी पूर्व विभागात सहा, पश्‍चिम विभागात बारा, नाशिक रोड विभागात नऊ, सातपूर विभागात आठ, सिडको विभागात दहा, तर पंचवटी विभागात आठ लसीकरण केंद्रे होती.

(corona-vaccine-shortage-in-nashik-marathi-news)