नाशिक : दोन-चार वर्षे प्रेमप्रकरणानंतर प्रेयसीने वेगळी वाट धरली असता, संशयित प्रियकराने तिच्यासमवेतचे फोटो-व्हिडिओ तिच्या नातलगांना देण्याची धमकी देत प्रियसीकडून सुमारे चार लाखांची खंडणी उकळल्याचा प्रकार उघडकीस आला आहे.

याप्रकरणी संशयित प्रियकरासह त्याच्या भावाविरोधात खंडणीचा गुन्हा दाखल करण्यात आला आहे. (Crime filed against extorting girlfriend Money taken by threatening photo video viral Nashik)

संतोष राजेंद्र आरोटे (२८), शुभम आरोटे (२५, दोघे रा. तामसवाडी, ता. निफाड, जि. नाशिक) अशी दोघा संशयितांची नावे आहेत. पीडित प्रियसीच्या फिर्यादीनुसार, संशयित संतोष याच्याशी तिचे प्रेमसंबंध होते.

मात्र नंतर तिने त्यांच्यातील प्रेमसंबंध संपविले होते. परंतु संशयित आरोटे याने तिला मेसेजद्वारे संपर्क साधत तिच्याकडे सातत्याने पैशांची मागणी केली. पैसे न दिल्यास त्याच्याकडे असलेले फोटो व व्हिडीओ तिच्या वडलांना पाठविण्याची धमकी दिली.

तसेच, स्वत: आत्महत्त्या करण्याची धमकी देत त्याने २०१९ ते २०२३ यादरम्यान पीडितेकडून ४ लाख २८ हजार ६०० रुपये घेतले आहेत. तसेच, पीडितेचे लग्न ठरले असता, संशयिताने ते लग्न मोडण्यासाठीही प्रयत्न केले असल्याचे पीडितेने तक्रारीत म्हटले आहे.

याप्रकरणी अखेर पीडितेने मुंबई नाका पोलीस ठाणे गाठून तक्रार दिली. त्यानुसार, दोघांविरोधात खंडणीचा गुन्हा दाखल करण्यात आला असून, अधिक तपास उपनिरीक्षक शेळके हे करीत आहेत.