नाशिक : कोरोना प्रतिबंधक आदेशाचे (corona virus) उल्लंघन करत बेकायदेशीररीत्या गर्दी जमवून द्वारका चौकात आंदोलन करण्यात आले. खासदार डॉ. भारती पवार, आमदार देवयानी फरांदे, नगरसेविका समिना मेमन, आशा तडवी यांच्यासह असंख्य आंदोलकांवर भद्रकाली आणि मुंबई नाका पोलिस ठाण्यात गुन्हा दाखल झाला आहे. शेतकऱ्यांच्या मागण्यांसंदर्भात खासदार डॉ. भारती पवार, आमदार देवयानी फरांदे, सीमा हिरे यांच्यासह सदाभाऊ खोत, वाल्मीक सांगळे, गिरीश पालवे यांच्यासह ३० ते ४० आंदोलकांनी बैलगाडी घेऊन एकत्र येत द्वारका चौक, तसेच जिल्हा मध्यवर्ती बँकेबाहेर निदर्शने केली होती. तर, मुस्लिम उत्कर्ष समितीतर्फे हनीफ बशीर यांच्या नेतृत्वाखाली मुस्लिम समाजाच्या आरक्षणासाठी द्वारका चौकात रास्ता रोको केला होता. (Crime-filed-against-MP-MLA-and-corporators-in-Nashik-marathi-news)

४० ते ५० महिला पुरुष आंदोलकांना घेतले ताब्यात

आपत्ती व्यवस्थापन कायद्याचे उल्लंघन करत आंदोलने करण्यात आली. यानिमित्ताने मुंबई नाका पोलिस ठाण्यात खासदार डॉ. भारती पवार, आमदार देवयानी फरांदे, सीमा हिरे, सदाभाऊ खोत, गिरीश पालवे यांच्यासह ३० ते ४० आंदोलनकर्त्यांवर मुंबई नाका पोलिसांनी ताब्यात घेत त्यांच्याविरुद्ध गुन्हा दाखल केला. त्याचप्रमाणे हनीफ बशीर, नगरसेविका समिना मेमन, आशा तडवी यांच्यासह ४० ते ५० महिला पुरुष आंदोलकांना भद्रकाली पोलिसांनी ताब्यात घेत गुन्हा दाखल केला.