Nashik Crime : चुंचाळे शिवारातील संजीवनगर शिवारात गुरुवारी (ता. १०) रात्री साडेसातच्या सुमारास लहान मुलांच्या भांडणातून एका युवकाचा खून झाला होता. तर एक तरुण गंभीर जखमी झाला होता.

गंभीर जखमी तरुणाचा शुक्रवारी (ता. ११) जिल्हा शासकीय रुग्णालयात उपचारादरम्यान मृत्यू झाला. दरम्यान, ही घटना सीसीटीव्हीत कैद झाली आहे. व्हिडिओदेखील समोर आला आहे. (Critically Injured Youth Dies During Treatment Four arrested including 2 juvenile suspects Nashik Crime)

अंबडच्या संजीवनगर भागात ही घटना घडली. दोन अल्पवयीन युवक एकमेकांना शिवीगाळ करत होते.

त्याचवेळी त्यांची भाषा न समजल्याने ही शिवीगाळ आपल्याला केली, या गैरसमजातून मेराज असगर अली खान आणि इब्राहिम हसन शेख या दोघांसोबत अल्पवयीन तरुणांचा वाद झाला.

त्यानंतर अल्पवयीन युवकांनी त्यांच्या सहकाऱ्यांना ही गोष्ट सांगितली. याचा राग मनात धरून टोळक्याने मेराज असगर अली खान आणि इब्राहिम हसन शेख यांच्यावर चाकू आणि दांडक्याने हल्ला केला.

या हल्ल्यात मेराज असगर अली खान याचा जागीच मृत्यू झाला. तर इब्राहिम हसन शेख हा गंभीर जखमी झाला होता. त्याचा जिल्हा शासकीय रुग्णालयात उपचारादरम्यान मृत्यू झाला.

हेही वाचा : Credit Card फसवणूक....काय घ्याल काळजी?

याप्रकरणी अंबड पोलिस ठाण्यात महम्मद शकील गरीब उल्हा खान (४२, रा. संजीवनगर) यांच्या तक्रारीवरून खुनाचा गुन्हा दाखल करण्यात आला आहे. यामध्ये दोन विधीसंघर्षित बालकांसह साहिल हिरामण लिलके (१९, रा. चुंचाळे शिवार), वैभव ऊर्फ दादा कैलास धोंगडे (२४, रा. खालचे चुंचाळे) यांना अटक करण्यात आली आहे.

पुढील तपास सुरू असल्याची माहिती पोलिस आयुक्त अंकुश शिंदे यांनी दिली. शुक्रवारी मृत इब्राहिम हसन शेख व मेराज असगर अली खान यांच्यावर सातपूर येथे शेकडो नागरिकांच्या उपस्थितीत दफनविधी करण्यात आला. मोठ्या प्रमाणावर पोलिस बंदोबस्त तैनात करण्यात आला होता. .