नाशिक : चालु आर्थिक वर्षाच्या अंदाजपत्रकामध्ये बीओटीच्या माध्यमातून महापालिकेच्या मिळकती विकास करण्याचा कार्यक्रम गुंडाळला असताना आता पुन्हा प्रशासनाकडून सहा मिळकती बीओटी तत्त्वावर विकसित करण्याचा निर्णय घेण्यात आला आहे.

त्यासाठी यापूर्वी नियुक्त करण्यात आलेल्या सल्लागार संस्थेचीच नियुक्ती केली जाणार आहे. भाजपच्या सत्ताकाळात २१ मिळकतीचे बीओटीकरण करण्याचा निर्णय घेण्यात आला. प्रत्यक्षात बारा मिळकती बीओटीवर विकसित करण्याचे ठरले. (Decision to develop 6 incomes on BOT basis Nashik NMC News)

हेही वाचा : अल्पमतातील निवाडे आणि सामान्य माणूस

मिळकती विकसित करण्यासाठी सहा सदस्यांची समिती गठित करण्यात आली आहे. आयुक्त समितीचे अध्यक्ष तर सदस्य सचिव म्हणून प्रशासन उपायुक्त, अतिरिक्त आयुक्त (शहर), शहर अभियंता, मुख्य लेखापरीक्षक, मुख्य लेखापाल यांचा समावेश आहे.

सल्लागार संस्थेने ६० वर्षाच्या भाडे पट्ट्यावर मिळकती देण्याची शिफारस केल्याचे समजते. सर्व्ह क्रमांक ७०८, अंतिम भूखंड क्रमांक ४५० नवरचना विद्यालय, मधुर स्वीट्स आरक्षण क्रमांक २३० (पै) अंतिम भूखंड क्रमांक ४५९, मॅग्नम हॉस्पिटल गंगापूर रोड, सर्वे क्रमांक १०४/ब. सातपूर टाऊन हॉल, सर्वे क्रमांक ४८८/अ/ब द्वारका जुने मलेरिया कार्यालय, अंतिम भूखंड क्रमांक १६०, बी. डी. भालेकर हायस्कूल, सर्वे क्रमांक २/अ, महात्मा गांधी टाऊन हॉल नाशिक रोड या मिळकतींचा समावेश आहे.