नाशिक : कोरोना (Corona) रुग्णांची संख्या वाढत असल्याच्या पार्श्वभूमीवर महापालिकेने (NMC) शहरात १५ जुलैपासून ३४ केंद्रे सुरू केली आहेत.

त्याचबरोबर आता नव्याने डॉ. झाकिर हुसेन रुग्णालय व नाशिक रोडच्या नवीन बिटको रुग्णालयात लसीकरण (Vaccination centre) करण्यासाठी २४ तास सुविधा उपलब्ध करून देण्याचा निर्णय घेतला आहे. (Decision to start 24 hours vaccination center in city nashik Latest Marathi news)

मोठ्या शहरांमध्ये कोरोना रुग्णांची संख्या सातत्याने वाढत आहे. तिसरी लाट सौम्य ठरण्यासाठी लसीकरण महत्त्वाचे ठरले होते. त्या पार्श्वभूमीवर केंद्र सरकारचे आरोग्य मंत्रालयाने राज्यांना दिलेल्या सूचनेनुसार स्थानिक स्वराज्य संस्थांमध्ये मोफत बूस्टर डोस देण्याच्या सूचना देण्यात आल्या आहेत.

त्यानुसार महापालिका हद्दीमध्ये नियमित लसीकरण व बूस्टर डोस देण्यासाठी ३४ लसीकरण केंद्रे सुरू करण्यात आल्याचा निर्णय घेण्यात आला आहे. शुक्रवारपासून नियमित लसीकरणासह बूस्टर डोस सुरू करण्यात आले आहेत.

शहरात १३ लाख २९९ नागरिकांनी पहिला डोस घेतला आहे, तर दहा लाख ५८ हजार ६५२ नागरिकांनी दुसरा डोस घेतला आहे. आतापर्यंत ७४ हजार ९३८ नागरिकांनी बूस्टर डोस घेतला आहे. ही टक्केवारी अवघे सहा टक्के आहे.

सात लाख २५ हजार नागरिकांनी अद्याप बूस्टर डोस घेतला नसल्याची माहिती वैद्यकीय अधीक्षक डॉ. बापूसाहेब नागरगोजे यांनी दिली. दरम्यान, ७५ दिवसांमध्ये बूस्टर डोसचा टप्पा करण्यासाठी जुने नाशिकमध्ये डॉ. झाकिर हुसेन रुग्णालय व नाशिक रोडच्या बिटको रुग्णालयात २४ तास लसीकरण केंद्र सुरू करण्याचा निर्णय घेण्यात आला आहे.