नाशिक : शहरात डेंगीच्या रुग्णांची संख्या ९२० पर्यंत पोहोचली असून खासगी रुग्णालयांमधील वाढती रुग्ण संख्यालक्षात घेता एक हजारांचा टप्पा ऑक्टोंबर अखेर पर्यंत गाठण्याची दाट शक्यता आहे. चिकनगुनियाने देखील मागील पाच वर्षांचे विक्रम मोडीत काढताना साडे सहाशे रुग्ण संख्या गाठली आहे. दरम्यान वाढत्या रुग्णसंख्येच्या पार्श्‍वभूमीवर पाच हजार ८१८ घरांमध्ये डेंगी डासांची उत्पत्ती साधने आढळून आली आहेत.

शहरात कोरोनाच्या तिसऱ्या लाटेची तयारी सुरु असली तरी दुसरीकडे डेंगी व चिकनगुणियाने तोंड वर काढले आहे. एक जानेवारी ते १४ ऑक्टोबर या कालावधी पर्यंत डेंगी सदृश्‍य आजाराचे ४,९२२ रुग्ण आढळले. रक्त तपासणीनंतर २० जणांना डेंगी झाल्याचे निष्पन्न झाले. दोन हजार ३८८ रक्त नमुन्यांची तपासणीनंतर ६५१ कनगुनियाचे रुग्ण आढळून आले. दरम्यान डेंगी व चिकनगुनिया रुग्णांची संख्या वाढूनही शहरात नियमित फवारणी होत नसल्याची बाब समोर येत आहे. डास निर्मूलनाच्या ठेक्यावरून सलेल्या न्यायालयात वाद सुरु आहे. मागील साडे नऊ महिन्यात १८ हजार ६३६ किलोमीटर भागात जंतूनाशक फवारणी करण्यात आली आहे. दोन लाख ५४ हजार ६४७ घरांमध्ये धुर फवारणी करण्यात आल्याचा दावा मलेरिया विभागाच्या वतीने करण्यात आला आहे. दरम्यान घराच्या परिसरात, छतावर, निकामी टायर्स, फुलदाण्यांमध्ये साचलेल्या स्वच्छ पाण्यातही डासांची उत्पत्ती होत असल्याने नागरिकांना तो भाग स्वच्छ करण्याचेआवाहन महापालिकेच्या मलेरिया विभागाच्या वतीने करण्यात येत आहे.

घरात आढळतायत डेंगीच्या अळ्या

मलेरिया विभागाच्या वतीने घरांमध्ये तपासणी करण्याची मोहिम हाती घेण्यात आली आहे. त्यानुसार तीन लाख २४ हजार २६३ घरांची तपासणी करण्यात आली. त्यात पाच हजार ८१८ घरांमध्ये डेंगी उत्पत्तीची स्थाने आढळली. डास उत्पत्तीला कारणीभुत ८८० नागरिकांना नोटीसा बजावण्यात आली आहे.