नाशिक : थकीत वेतनाचे बिल मंजूर करण्यासाठी कोणताही आक्षेप न घेण्यासाठी १० हजार रुपयांची लाच स्वीकारताना चांदवडच्या उपकोषागार अधिकाऱ्यास रंगहाथ अटक करण्यात आली. सुनील सुभान तडवी (४९, रा. मर्चण्ट कॉलनी, खंडेराव महाराज मंदिर रोड, चांदवड) असे लाचखोर अधिकाऱ्याचे नाव आहे. (Deputy Treasury Officer of Chandwad arrested for accepting bribe Nashik Bribe Crime news)

हेही वाचा : इच्छापत्र करायचंय...मग या गोष्टी नक्कीच माहिती हव्यात....

तक्रारदाराच्या तक्रारीनुसार, त्यांच्या थकीत वेतनाचे बिल मंजूर करण्यासाठी व त्यावर कोणताही आक्षेप घेऊ नये यासाठी लाचखोर तडवी याने १५ हजार रुपयांच्या लाचेची मागणी केली होती. तडजोडीअंती १० हजार रुपयांची लाच देण्याचे ठरले होते. यासंदर्भात तक्रारदाराने लाचलुचपत प्रतिबंधक विभागाकडे तक्रार केली. लाचलुचपत प्रतिबंधक विभागाकडून तक्रारीची शहानिशा केल्यानंतर मंगळवारी (ता. १३) सापळा रचण्यात आला होता. त्यानुसार, तक्रारदार यांच्याकडून पंचासमक्ष लाचखोर तडवी याने १० हजार रुपयांची लाचेची रक्कम स्वीकारली.

त्यावेळी दबा धरून असलेल्या लाचलुचपत प्रतिबंधक विभागाच्या पथकाने लाचखोर तडवी यास रंगेहाथ अटक केली. तडवी हे चांदवड येथील कोषागार कार्यालयामध्ये उपकोषागार अधिकारी या पदावर काम करीत होते. याप्रकरणी चांदवड पोलिसात गुन्हा दाखल करण्यात आला आहे. सदरची कारवाई लाचलुचप प्रतिबंधक विभागाच्या अधीक्षक शर्मिष्ठा घारगे-वालावलकर, अपर अधीक्षक नारायण न्याहाळदे यांच्या मार्गदर्शनाखाली पोलीस निरीक्षक गायत्री जाधव-पाटील, प्रकाश महाजन, परशुराम जाधव यांनी केली आहे.