Nashik Bribe Crime : दिंडोरीचे प्रांताधिकारी निलेश अपार यांनी खासगी कंपनीची जमीन एनए करण्यासाठी ४० लाख रुपये लाचेची मागणी केली.

याप्रकरणी तक्रारदाराच्या तक्रारीनुसार लाचलुचपत प्रतिबंधक विभागाच्या पथकाने प्रांत अपार यांच्याविरोधात दिंडोरी पोलिसात गुन्हा दाखल करण्यात आला आहे. (District prant officer of Dindori Demands Bribe of Rs 40 Lakhs ACB action case registered Nashik Bribe Crime)

दिंडोरीचे उपविभागीय अधिकारी तथा प्रांत निलेश अपार (३७, रा. स्वामी बंगला, शासकीय विश्रामगृह, दिंडोरी) असे लाचखोर अधिकाऱ्याचे नाव आहे. ५७ वर्षीय तक्रारदारानुसार, त्यांची दिंडोरी येथे कंपनी आहे.

या कंपनीचे बांधकाम करताना त्यांनी अकृषीक परवानगी घेतली नव्हती. त्यामुळे प्रांत अपार यांनी कंपनीस नोटीस बजावण्यात आली होती. तसेच कंपनीचे उत्पादन बंद करण्याबाबत तोंडी सांगितले होते.

सदर कंपनीवर कारवाई न करण्यासाठी, तसेच बंद कंपनी पुन्हा सुरू करण्यासाठी तक्रारदाराकडे प्रांत अपार यांनी ५० लाखांची मागणी केली. तडजोडी अंती ४० लाख रुपयांची मागणी करून ती स्वीकारण्याची तयारी प्रांत अपार यांनी दर्शविली होती.

हेही वाचा : Credit Card फसवणूक....काय घ्याल काळजी?

याप्रकरणी तक्रारदाराने नाशिक लाचलुचपत प्रतिबंधक विभागाकडे तक्रार केली. त्यानुसार लाचलुचपतच्या पथकाने तक्रारीची पडताळणी केली.

दरम्यान तक्रारदाराने लाचेची रक्कम स्वीकारण्यासाठी वेळकाढूपणा होत असल्याने ‘लाचलुचपत प्रतिबंधक विभागाच्या पथकाने तांत्रिक पुराव्यांच्या आधारे दिंडोरी पोलिसात प्रांत अपार यांच्याविरोधात गुन्हा दाखल केला आहे.

सदरची कारवाई ‘लाचलुचपत’च्या अधीक्षक शर्मिष्ठा घारगे-वालावलकर, अपर अधीक्षक माधव रेड्डी यांच्या मार्गदर्शनाखाली उपअधीक्षक नरेंद्र पवार, पोलीस निरीक्षक संदिप साळुंखे, डोंगरे, इंगळे यांनी केली.