Lalit Patil Drug Case : अमली पदार्थ तस्करी प्रकरणातील संशयित अक्षय नाईकवाडेला भोपाळमधून अटक केल्यानंतर आता या प्रकरणातील मुख्य संशयित ललित पाटील याचा नाशिक पोलिस ताबा घेणार आहेत.

त्यामुळे या गुन्ह्यातील महत्त्वाची माहिती पोलिसांना मिळण्याची शक्यता वर्तवली जाते. (Drugs mafia Lalit Patil will take over Nashik police news)

अमली पदार्थ विरोधी पथकाने शिंदे गावातील श्री गणेशाय इंडस्ट्रीजवर छापे टाकत येथून मोठ्या प्रमाणात अमली पदार्थ हस्तगत केला. दोन महिन्यांत या गुन्ह्याची व्याप्ती प्रचंड प्रमाणात वाढली आणि चौदापेक्षा अधिक संशयितांवर गुन्हा दाखल करण्यात आला. यातील मुख्य संशयित म्हणून ललित पाटील याचे नाव घेतले जाते.

२ नोव्हेंबरला पुणे पोलिसांचे पथक ललित घेऊन नाशिकला येऊन गेले. त्यानंतर ललितकडून पोलिसांनी पाच किलो सोने जप्त केले होते. या पार्श्वभूमीवर पुणे पोलिस अधिक तपासासाठी ललितला नाशिक पोलिसांच्या स्वाधीन करणार आहेत. शुक्रवारी (८) मध्यरात्री तो नाशिक पोलिसांच्या ताब्यात मिळण्याची शक्यता सूत्रांनी वर्तवली आहे.

ललितचे साथीदार...

पोलिसांनी ललितसह सुभाष मंडल, रौफ शेख, भूषण पाटील, अभिषेक बलकवडे, रेहान ऊर्फ गोलू अन्सारी, अरविंदकुमार लोहरे, प्रज्ञा कांबळे, जिशान शेख, शिवाजी शिंदे, राहुल पंडित यांना ताब्यात घेतले आहे. न्यायालयाने त्यांना कोठडी सुनावली आहे.

संशयितांकडून दोन कोटी १४ लाख ३० हजार रुपयांचे मेफेड्रान जप्त करण्यात आले आहे. अमली पदार्थ विक्रीतून संशयितांनी खरेदी केलेली आठ किलो सोन्याची बिस्किटे, महागड्या मोटारी, मोबाईल असा पाच कोटी ११ लाख ४५ हजार रुपयांचा मुद्देमाल पोलिसांनी जप्त केला आहे.