नाशिक : जिल्ह्यात डेल्टा व्हेरिएंटचे (Delta Variant) रुग्ण आढळल्याने ज्या भागात रुग्ण आढळून आले, त्या भागातील कॉन्टक्ट ट्रेसिंग तसेच जिल्ह्याबाहेरून येणाऱ्या प्रवाशांची अ‍ॅन्टीजेन तसेच थर्मल स्क्रिनिंग करण्याचा निर्णय प्रशासनाने घेतला आहे.

प्रवाशांची होणार तपासणी

नाशिकला कोरोनाच्या दुसऱ्या लाटेचा संसर्ग कमी होत असल्याने निर्बंधातून सूट दिली असताना जिल्ह्यात डेल्टाचे ३० रुग्ण आढळल्याने कोरोनाच्या तिसऱ्या लाटेचा धोका व्यक्त केला जात आहे. मात्र जिल्ह्यात आढळलेले हे रुग्ण जून- जुलै महिन्यातील असून, हे रुग्ण कोरोनामुक्त झाले असून या रुग्णांची माहिती संकलित केली जात आहे. त्यांनी नजीकच्या काळात कोणत्या जिल्ह्यात प्रवास केला. कुणाशी संपर्क आला याची माहिती संकलित केली जात आहे. परंतु यात घाबरण्याचे कारण नसले तरी, खबरदारी म्हणून कॉन्टक्ट ट्रेसिंगवर भर दिला आहे.

नाशिक जिल्ह्याला लागून असलेल्या नगर, पुणे, मुंबई या भागात अजूनही रूग्णसंख्या वाढत असल्याने येथून येणाऱ्या प्रवाशांच्या अ‍ॅन्टीजेन तपासणीचा प्रशासनाने निर्णय घेतला आहे. मात्र यामुळे महामार्गावर वाहनांच्या रांगा लागून वाहतूक कोंडीची समस्या होऊ शकते म्हणून, सरसकट तपासणी न करता निवडक प्रवाशांची तपासणी करून बाहेरून येणाऱ्या ‍प्रवाशांवर लक्ष केंद्रित केले जाणार आहे. नागरिकांनी घाबरून जाण्याचे कारण नसले तरी, मास्क लावणे, कोरोना नियमांचे पालन करणे आवश्यक असून नागरिकांनी गर्दी टाळावी, असे आवाहन प्रशासनातर्फे करण्यात आले आहे.

जिल्हा कोरोना रुग्ण संसर्ग दर

नगर - ५३८६ - ५.३ टक्के

पुणे - ६४९१ - ५.८ टक्के

डेल्टाचे रुग्ण आढळून आल्याने नागरिकांनी घाबरून जाण्याचे कारण नाही. यामुळे निर्बंधातही कोणते बदल करण्यात येणार नाही. ज्या भागात रुग्ण आढळून आले आहे त्या भागात आरोग्य विभागामार्फत विशेष लक्ष केंद्रित केले जाणार आहे.

- सूरज मांढरे, जिल्हाधिकारी

बाहेरच्या जिल्ह्याहून हा व्हेरिएंट असावा असा प्राथमिक अंदाज आहे. त्या अनुषंगाने आम्ही बाहेरून येणाऱ्या प्रवाशांवर विशेष लक्ष केंद्रित केले आहे. येणाऱ्या प्रवाशाची थर्मल स्क्रिनिंग करणे, अ‍ॅन्टीजेन तपासणी करण्यावर भर देण्यात येणार आहे.

- सचिन पाटील, पोलीस अधीक्षक